Праз дзевяць месяцаў пасля трыумфу ў Канах «нямецка-аўстрыйскага» фільму Сяргея Лазніцы паводле аповесці Васіля Быкава «У тумане», стужка нарэшце выйшла ў пракат у Менску. Аднак пракат гэты — да смешнага абмежаваны. Фільм два тыдні паказвалі ўсяго толькі ў адным менскім кінатэатры. Як тое часта апошнім часам здараецца з творамі беларускай культуры, фільм лягчэй пабачыць у бліжэйшым замежжы, чым у самой Беларусі. Гэтак і зрабіў Generation.by, накіраваўшыся на віленскую прэм’еру «У тумане».