Інфармацыя аб з’яўленні новай прэміі Rock Profi з’явілася некалькі тыдняў таму, а ўжо ўчора задаволеныя музыкі забіралі ўзнагароды з менскага клуба. Галоўная разынка гэтага беларускага музычнага аварду — пераможцаў абіраюць самі выканаўцы, якія выдалі прынамсі адзін альбом за апошнія тры гады. У гэтым годзе арганізатары прапанавалі 80 артыстам прагаласаваць, з якіх 57 узялі ўдзел. Яны ацанілі 47 альбомаў, 72 песні і каля 30 артыстаў. Больш за чатыры гадзіны кантрольны камітэт лічыў вынікі галасавання і каля трох гадзін цягнулася само ўзнагароджанне. 

2012 год стаў бадай што самым багатым годам на музычныя прэміі і ўзнагароджванні ў найноўшай гісторыі Беларусі. Уручыўшы нядаўна ўзнагароды сайту Experty.by, ягоны стваральнік Зміцер Безкаравайны вырашыў не спыняцца на дасягнутым і разам з Паўлам Юрцэвічам (студыя «Осмас») заснаваў яшчэ адну музычную прэмію — Rock Profi. Некаторыя падумалі, што з’яўленне чарговай музычнай прэміі — гэта адкрыты жарт, і не дзіўна, бо інфармацыя пра яе пачала распаўсюджвацца акурат 1 красавіка. Але ж гэта былі не жарцікі і, са словаў арганізатараў, Rock Profi рыхтавалася даўно.