Эўразьвяз дае грошы на разьвіцьцё беларускай вышэйшай адукацыі

15 мільёнаў эўра вылучыла Эўракамісія на праграмы абмену студэнтаў і выкладчыкаў з шасьці краін Усходняга партнэрства. Зь іх 3 мільёны могуць пайсьці на праграмы мабільнасьці з удзелам беларускіх студэнтаў.

Усе 15 мільёнаў пойдуць на праграму мабільнасьці Erasmus Mundus для студэнтаў ВНУ з краін Усходняга партнэрства. Яшчэ 16 мільёнаў эўра пойдуць на прывядзеньне заканадаўства краін-партнэраў ЭЗ у адпаведнасьці з эўрапейскімі нормамі і стандартамі, а таксама на рэформы ў кіруючым сэктары.

«Вышэйшая адукацыя і ў прыватнасьці студэнцкая мабільнасьць і іншыя формы жывых камунікацый дазваляюць падвысіць паразуменьне паміж людзьмі, краінамі і культурамі», — адзначаецца ў рашэньні Эўракамісіі.

У 2007 годзе Эўракамісія запусьціла праграму External Cooperation Windows (ECW) , якая давала магчымасьць магістрантам, а таксама выкладчыкам і студэнтаў унівэрсытэтаў суседніх з ЭЗ краін езьдзіць па абмене ў эўрапейскія ўнівэрсытэты. Да праграмы далучыліся два беларускія унівэрсытэты: БДУ і гарадзенскі ГрДУ. У 2010 навучальным годзе ў межах гэтай праграмы каля 67 беларускіх студэнтаў і выкладчыкаў навучаюцца альбо мелі вопыт выкладаньня ва ўнівэрсытэтах ЭЗ.

Агулам пяцігадовы бюджэт праграмы складае амаль мільярд эўра (у папярэднія пяць гадоў на Erasmus Mundus Эўракамісія вылучала сродкі ў два разы меншыя). Але на наступны навучальны год на ўдзел у праграмах абмену з унівэрсытэтамі ЭЗ (набор на ўдзел скончыцца праз тыдзень) для грамадзян Беларусі, Украіны і Малдовы было вылучана толькі 232 стыпэндыі. Гэта больш чым 60% усіх стыпэндый для краін УП. Такім чынам, адпаведна зь існымі прапорцыямі, разьдзел Erasmus Mundus для беларускіх студэнтаў можа атрымаць фінансаваньне ў памеры 3 мільёнаў эўра.