6 лютага канцэрт легенды Ленінградзкага рок-клюбу — гурта «Тэлевізар»

Міхаіл Барзыкін і гурт «Тэлевізар» (Санкт-Пецярбург) выступяць 6 лютага ў менскім клюбе R-CLUB. У праграме канцэрту будуць прадстаўленыя галоўныя песьні «Тэлевізару» за 25 год і новы альбом «Дэжавю».

«Тэлевізар» — родапачынальнікі рускай нэарамантыкі, адзін з самых неардынарных гуртоў постсавецкай прасторы, які спалучае ў творчасьці электронную музыку, стылістычна блізкую да Depeche Mode, і лірыку са змрочным аналізам і супрацьстаяньнем рэальнасьці.

Каманда захавала бунтарскі дух рок-музыкі 80-х і займае пратэстную пазыцыю ў сьвеце капіталу і духоўнай беднасьці: і праз гады іх нонканфармісцкія праграмы застаюцца вострымі, а гіт з далёкага 1987-га «Твoй пaпa фaшиcт» сёньня гучыць актуальна і фактычна атрымаў другое нараджэньне — на «Маршах нязгодных» ён гучыць як «Твoй Путин фaшиcт».

Ігнаруючы камэрцыйны посьпех і рэйтынгі папулярнасьці «Тэлевізар» у новым альбоме «Дэжавю» выконвае сапраўдны пратэстны рок з вострымі, крытычнымі тэкстамі — менавіта такім рускі рок і быў першапачаткова, музыкай пратэсту, здольнай павесьці за сабою армію фэнаў.

Нязьменны лідэр калектыву Міхал Барзыкін (вакаліст, аўтар тэкстаў, музыкі і аранжыровак) займае актыўную грамадзянскую пазыцыю, што ў апошнія гады стала прычынаю амаль татальнай забароны на зьяўленьне ягоных песень у этэры расейскіх тэле- і радыёканалаў.

Канцэрт пройдзе 6.02.2010 у «R-CLUB» (Сурганава, 26), пачатак, а 19:00. Квіткі: 30–50 тыс. Даведка і замова квіткоў: (029) 7613013, (029) 3317304.

Паводле прэс-рэлізу. Афіцыйны сайт гурта — televizor.spb.ru.