Фінальны атмасфэрны фотарэпорт з Sziget-2010 (ч.3)

На сцэне ваююць Iron Maiden, эпатажыць Nina Hagen, гаспадараць Muse — зацэньваем хэдлайнэраў і выступоўцаў завяршальных дзён фэсту, шпацыруем і фатаграфуем людзей, забавы. Цяпер, па прыезьдзе з фэсту, кожны здымак выклікае кучышчу ўзгадак і эмоцыяў. Глядзім фінальны фотарэпорт з самага працяглага эўрайпескага фэстывалю. 

Пераходзім адразу да мэталёвых хэдлайнэраў Sziget — Iron Maiden. Дзядзькі лабаюць на сцэнах сьвету болей, чым мы жывем! Сёлета «мэйданы» сьвяткуюць 35 гадоў на сцэне. Стары добры мэтал.

А гэта скандальная Nina Hagen. За плячыма нямецкай сьпявачкі ўжо 16 студыйных альбомаў. Апошні зь іх «маці панку» выдала ў гэтым годзе — «Personal Jesus».

Так мы там жылі :) Гэта ўсходняя частка востраву, дзе ёсьць магчымасьць спыняцца разам з аўто.

На большасьці фэстаў розная хатняя жыўнасьць забароненая, аднак тут хапае гіпі-сем'яў з сабакамі.

Знаходзяцца й такія, каму мала некалькіх сотняў выканаўцаў :) Знаёмцеся, гэта нашыя суседзі французы.

Гэта мост, празь які ўсе трапляюць непасрэдна на востраў, які знаходзяцца пасярод гораду. На ўваходзе ўсіх пільна даглядаюць, каб не праносілі алькаголю. Ваду і ежу — можна. Таму з тых, каго «засяклі», утвараецца невялікая пробка — стараюцца выпіць на месцы, каб не аддаваць дабро ахоўнікам, альбо прадаць за бясцэнак.

Роварная станка на востраве, бясплатная. Кажуць, што і ў арэнду дзесьці там можна было браць ровары — зацэнім наступным разам. А лепш за ўсё расьсякакаць між натоўпамі на скутэры, як робяць супрацоўнікі маленькіх кавярняў, няспынна дастаўляючы напоі. 

Тут усе любяць Sziget! Робяць інсталяцыі, выстрыгаюць лягатып на галаве, малююць татухі... Суцэльная сігетаманія!

На галоўнай сцэне Kasabian — брытанцы з электронным рокам і брыт-попам. 

Месца паломніцтва ўсіх наведвальнікаў фэсту :) Тут прадаюць цішоткі, байкі, торбы з сымболікай Sziget. Задавальненьне ня таннае: майка каштуе 18 эўра, байка — 34. Аднак дзеля такой памяці выбудоўваюцца чэргі. Памеры, колеры — хапае на любы густ. А ў намёце побач ідзе распродаж прадукцыі з папярэдніх гадоў: нашмат таньней, аднак і не пахвастаесься сьвежачком і надрукаванай на сьпіне праграмай менавіта «твайго» Сігету.

О, а гэта бар у паветры! У тым ліку так рэклямуецца адзін з галоўных спонсараў фэсту — піва Dreher. Набіраюць 20 чалавек і паднімаюць на вышыню 10-павярховага дому! Бармэн налівае піва, а ты сядзіш, боўтаеш нагамі і радуесься жыцьцю. Ня дзіва, што ў такі бар і чарга немалая.

Ужо грае Muse! І калі ў папярэднія дні можна было сьмела прапускаць мэйн стэйдж, шукаючы больш цікавую, аднак менш папулярную музыку на маленькіх сцэнах, то галоўныя хэдлайнэры Sziget'2010 не пакідаюць такой магчымасьці.

Тыдзень прайшоў, пакуем рэчы дадому. Пакінуць тэрыторыю фэсту трэба рана раніцай — тым, хто па простых глядацкіх квітках, з караван-кэмпінгу і паркінгу трэба зьехаць да абеду. Ноткі настальжы ўжо прысутнічаюць. Мы зьяжджаем, але плянуем вярнуцца! :) 

Чытаем (і глядзім) увесь дзёньнік з нашай вандроўкі на Sziget'2010!