Эўракамісія падтрымае зачынены ў Беларусі ўнівэрсытэт

Савет міністраў Паўночных краінаў (СМПК) і Эўракамісія напрацягу тыдня плянуе падпісаць дамоўленасьць аб сумеснай падтрымцы Эўрапейскага гуманітарнага ўнівэрсытэта (ЭГУ). Пра гэта БелаПАН паведамілі ў прэс-службе СМПК.

Нагадаем, ЭГУ, зачынены беларускімі ўладамі ўлетку 2004 года, у кастрычніку 2005 года пачаў сваю працу ў Вільні (Літва). Фінансавую падтрымку ўнівэрсытэту забясьпечылі шматлікія прыватныя фонды, НДА і кіраўніцтва краінаў ЭЗ і ЗША.

У межах трохгадовага праекта прадугледжваецца фінансаваньне навучаньня 350 беларускіх студэнтаў. Чакаецца, што на гэтыя мэты будзе выдзелена 20 млн. дацкіх кронаў (каля 3 млн. 200 тыс. даляраў ЗША), а таксама будзе забясьпечаная двухбаковая тэхнічная дапамога непасрэдна СМПК і ўладамі Швэцыі і Фінляндыі. Дапамога з боку Эўракамісіі будзе накіраваная праз праграму Эўрапейскай ініцыятывы ў галіне дэмакратыі і правоў чалавека. 

У паведамленьні генэральнага сакратара Савета міністраў Паўночных краінаў Пера Ункеля ад 19 сьнежня падкрэсьліваецца, што падтрымка ЭГУ зьяўляецца часткай падтрымкі дэмакратыі ў Беларусі. Прэс-служба таксама адзначае, што праект дапамогі студэнтам ЭГУ - не адзіны праект Савета міністраў Паўночных краінаў і Эўразьвяза ў адносінах да Беларусі. Так, бакі прымаюць удзел у трансгранічным  рэгіянальным праекце краінаў Балтыі, які рэалізуецца і ў памежных раёнах рэспублікі. 

У склад Савета міністраў Паўночных краінаў уваходзяць міністры краінаў і аўтаноміяў Паўночнага зьвяза - Даніі, Ісландыі, Нарвэгіі, Фінляндыі, Швэцыі, Грэнляндыі, Фарэрскіх і Аладанскіх вастравоў. Задача гэтай арганізацыі - разьвіцьцё супрацоўніцтва ў паўночнай частцы Эўропы.

Паводле Белапан