Беларускі ўніверсітэт хоча вучыць амерыканцаў
Рэктар Беларускага дзяржаўнага ўніверсітэту інфарматыкі і радыёэлектронікі завіў аб магчымасці адкрыцця навучальных курсаў у Амерыцы. Экспансія ў ЗША мусіць адбыцца пры дапамозе выпускнікоў універсітэту, якія цяпер працуюць за мяжой, а навучальны працэс будзе праходзіць дыстанцыйна.
Рэктар БДУІР Міхаіл Батура кажа, што вельмі шмат хто хоча вучыцца ў ягоным універсітэце. Месца для ўсіх не хапае, і таму «кіраўніцтва навучальнай установы задумалася, як пашырыць сваю дзейнасць, у тым ліку на далёкія краіны», перадае БелТА.
Першай такой далёкай краінай можа стаць ЗША, дзе ўжо працуюць дзясяткі, калі не сотні праграмістаў, што атрымалі адукацыю ў БДУІР. Некаторыя з іх дапамагаюць універсітэту, прасоўваючы ягоныя інтарэсы за акіянам. І пры гэтым, канешне, зарабляюць самі.
«Нам неабходна актыўна ўзаемадзейнічаць са сваімі выпускнікамі, бо яны маюць магчымасць і могуць прывозіць у краіну інвестыцыі. Прычым гаворка ідзе аб узаемадзеянні рознага роду — як фінансавага, гэтак і духоўнага плана», — сказаў Міхаіл Батура.
Зусім нядаўна дзякуючы клопату былых выпускнікоў БДУІР, якія цяпер працуюць у ЗША, у ВНУ быў адкрыты міжнародны цэнтр Android Software Center, дзе студэнтаў 4 гады будуць вучыць пісаць праграмы для айфону і іншых мабільных сістэм. Грошы на цэнтр далі амерыканцы. Яны купілі кампутары і неабходнае праграмнае забеспячэнне. Падтрымка беларускай адукацыі каштавала амерыканскаму боку каля $40 тыс.
БДУІР спадзяецца навучаць амерыканцаў праз папулярны цяпер фармат дыстанцыйных онлайн-курсаў. Цяпер універсітэт мае некалькі праграмаў, дзе навучанне адбываецца толькі па-ангельску. Амерыканцам, верагодна, будзе прапанавана атрымаць адукацыю ў галінах тэлекамунікацыйных сетак, інфармацыйнай бяспецы ў тэлекамунікацыях, метадах абароны інфармацыі.
БДУІР не ўваходзіць ні ў водны з найбольш прадстаўнічых рэйтынгаў вышэйшых навучальных установаў свету.
Некалькі месяцаў таму іншы беларускі ўніверсітэт, ЕГУ, заявіў аб жаданні пачаць навучаць расейскамоўнае насельніцтва Германіі. Адукоўваць таксама плануюць праз дыстанцыйныя курсы.