Міністр адукацыі: «Калі студэнты захочуць, за дзень здымуць рэктара»

Міністр адукацыі Сяргей Маскевіч усё яшчэ спадзяецца зрабіць нацыянальную сістэму адукацыі часткаю агульнаеўрапейскай прасторы. Аднак рэфармаваць сістэму дзеля гэтага, як таго патрабуюць у Еўропе, не збіраецца.

Пасля правалу мінулагодняй спробы Беларусі ўвайсці ў Балонскі працэс беларускія чыноўнікі амаль перасталі прыгадваць аб жаданні далучыцца да агульнаеўрапейскай прасторы вышэйшай адукацыі. Іхняя ўвага ўсё болей пераключаецца на ўсход, адкуль прыязджаюць тысячы замежных студэнтаў з немалымі грашыма (22 млн. даляраў зарабілі беларускія ўніверсітэты на замежніках за апошні год — на гэтыя грошы можна было бясплатна вывучыць усіх студэнтаў БДУІР).

У выніку, беларускія студэнты страчваюць магчымасці навучання ва ўніверсітэтах ЕС, а найбольш папулярным накірункам, куды выязджаюць беларускія навучэнцы, становяцца Расея, Кітай і Украіна.

У Балонскі працэс Беларусь беспрэцэндэнтым рашэннем 47 краін Балонскага пагаднення ў траўні 2012 году ўзяць адмовіліся з-за адсутнасці ў нашай краіне акадэмічнай свабоды, інстытуцыйнай аўтаноміі, студэнцкага ўдзелу ў кіраванні вышэйшай адукацыяй і парушэнняў правоў студэнтаў. Аднак міністр адукацыі лічыць, што ў нашай краіне з свабодамі праблемамі няма, а студэнты за дзень могуць адправіць у адстаўку рэктара:

У Беларусі «студэнты праз органы самакіравання вельмі сур’ёзна ўплываюць і могуць яшчэ больш уплываць на палітыку ВНУ. Калі яны захочуць, за дзень здымуць рэктара», — заявіў міністр Маскевіч на калегіі Міністэрства адукацыі.

Як пішуць naviny.by, міністр лічыць, што іншыя складаючыя акадэмічных свабодаў, напрыклад, выбарнасць рэктараў, ніякім чынам з Балонскім працэсам не звязаныя.

Таму пра рэформу адукацыі, якая б прынесла свабоду ўніверсітэтам, марыць не варта. Затое чыноўнікі, каб наблізіцца да Балонскай прасторы, збіраюцца «праводзіць розныя мерапрыемствы ў Беларусі і ўдзельнічаць у міжнародных мерапрыемствах». «Мы будзем развіваць нашу сістэму адукацыі ў адпаведнасці з традыцыямі і правіламі, закладзенымі ў Балонскай дэкларацыі», — упэўнівае Сяргей Маскевіч.

Наступная магчымасць далучыцца да адзінай адукацыйнай прасторы Еўропы ў Беларусі з’явіцца толькі ў 2015 годзе. Аднак міністр адукацыі спадзяецца «правярнуць» усё хутчэй: ён не выключае, што рашэнне па Беларусі можа быць прынятае да саміту міністраў адукацыі кантыненту ў працоўным парадку. Хоць і кажа, што гэта пакуль толькі надзеі.