Спявак адкрывае ў Менску беларускамоўны хостэл

Беларускі спявак Пятро Клюеў адкрывае днямі хостэл Sky, што месціцца ў двухпавярховай кватэры акурат побач са студэнцкім інтэрнатам. Generation.bY завітаў напярэдадні адкрыцця ў яшчэ адно менскае прыселле беларускіх і замежных падарожнікаў, дзе з парога натуральным чынам вітаюць па-беларуску.

«Вітаць безумоўна усіх будзем па-беларуску, калі нас не будуць разумець, то будзем пераходзіць на мову кліента. Я на гэтым так моцна не акцэнтую ўвагу, я лічу, што гэта натуральна», — мяркуе Пятро Клюеў. 

Чараду свежаадкрытых хостэлаў 2012 году завяршае двухпавярховая кватэра з 4 гаўбцамі у цэнтры Менску. Знаходзячыся ў хостэле Sky, які месціцца ў прыбудове да інтэрната БДУІРа, можна пабачыць розныя куткі сталіцы: ад Палаца Рэспублікі да Нацыянальнай бібліатэкі. Пераночыць тут, на апошнім паверсе шматпавяховіка, каштуе 15 долараў. Акрамя начлега за гэтыя грошы можна будзе напіцца кавы, гарбаты і падсілкавацца крэкерамі. 

«Сёння пераночыць у Менску — гэта рэальная праблема, гатэлі дарагія. Нашыя людзі да гэтай псіхалогіі не падрыхтаваныя. І мы разлічваем перш за ўсё на замежнікаў, у нас будзе прадстаўніцтва за мяжой, будуць брытанскі і латышскі нумары тэлефонаў», — кажа ўладальнік Клюеў.  

«Можна проста ўзяць і паставіць ложкі, але людзі туды не паедуць, таму што хостэл — гэта атмасфера, гэта таксама субкультура. І не кожны прадпрымальнік можа яе стварыць, трэба мець досвед, пажыць у хостэлах. Гэта і нейкія цікавыя гадзіннікі, адмысловая літаратура, карціны. І перш за ўсё людзі. Вельмі прыемна, калі сам уладальнік хостэла пад’едзе, пагутарыць, вырашыць тваю праблему з рэгістрацыяй, напрыклад. Памылка шматлікіх хостэлаў яшчэ і ў тым, што яны не разлічваюць на пастаянных кліентаў, я яе буду выпраўляць, у тым ліку і рабіць зніжкі пастаянным кліентам». 

Таксама Клюеў абяцае зніжкі ў пабах і кавярнях Меснку, а таксама магчымасць бясплатна схадзіць на беларускія канцэрты.

Фота: Юля Fox