Ці нармальна для турыста ЧС па хакеі тое, з чым мірыцца беларускі студэнт?

Учора старшыня Беларускай федэрацыі хакея Яўген Ворсін заявіў, што студэнтам шэрагу ВНУ давядзецца пакінуць інтэрнаты ўжо ў пачатку красавіка 2014 года, за месяц да старту чэмпіянату свету па хакеі ў Мінску, бо на амаль 18 тысяч ложкаў студінтэрнатаў мяркуецца пакласці большасць замежных турыстаў. Але як сябе будуць пачуваць хакейны заўзятары ў будынках інтэрнатаў, ступень гатоўнасці якіх выклікае сумневы?

У такіх інтэрнатах будуць жыць замежныя турысты ў час ЧС па хакеі. Фота bsuir.by

Аб тым, што студэнтам БДУ, БДУІР, МДЛУ, БДПУ і іншых менскіх універсітэтаў прыйдзецца пацясніцца, а, можа, і ўвогуле сысці на вымушаныя вакацыі, стала вядома яшчэ ўвесну. Сёння планы па высяленні каля 18 тыс. студэнтаў з інтэрнатаў пацвердзіў старшыня Беларускай федэрацыі хакея Яўген Ворсін:

«Студэнты выедуць з інтэрнатаў, якія плануецца выкарыстаць для пражывання турыстаў, за месяц да пачатку чэмпіянату свету. Таму, для падрыхтоўкі да ЧС, плануецца завяршыць навучальны год на месяц раней. Гэтыя пытанні ўжо абмеркаваныя з Міністэрствам адукацыі», — перадае словы Ворсіна «Інтэрфакс-Захад».

Што здарыцца са студэнтамі пасля сканчэння ЧС, пакуль незразумела:

«Можа, пасля заканчэння чэмпіянату яны зноўка заедуць», — дадаў старшыня Беларускай федэрацыі хакея.

У размяшчэнні турыстаў, якія прыедуць на ЧС, плануецца задзейнічаць студэнцкую вёску, у якой можна размясціць 8 800 чалавек, а таксама 11 інтэрнатаў мінскіх ВНУ, у якія могуць засяліцца 9 тыс. чалавек. Агулам Мінск можа адначасова прыняць да 20 тыс. аматараў хакея з іншых краін.

Разеткі не працуюць, лядоўні ламаюцца, а прыбіральні не зачыняюцца

Тым часам, паводле інфармацыі журналістаў, не ўсё добра ў будучым прытулку хакейных заўзятараў. У прыватнасці, студэнтаў, што засяліліся ў нядаўна ўзведзеныя будынкі Студэнцкай вёскі на паўднёвым захадзе Мінску, могуць турбаваць шматлікія шчыліны ў сценах інтэрнату Беларускага дзяржаўнага медыцынскага ўніверсітэту:

«Шчылін у інтэрнаце вельмі шмат, — адзначае карэспандэнт Tut.by. — Калі выпадкова пляснуць дзвярыма, то іх не абмінуць. Дзіўна, улічваючы тое, што яны былі ўведзены ў эксплуатацыю зусім нядаўна».

Як піша партал, шчыліны «з’яўляюцца паўсюль, але студэнтаў гэта не вельмі хвалюе. Яны папросту не звяртаюць на іх увагі».

Іншая неспадзяванка, што можа «парадаваць» замежных турыстаў, — непрацуючыя разеткі. Некаторыя з іх у інтэрнаце БДУ у студвёсцы проста не падлучаныя. У сітуацыі, калі ў кожнага ёсць тэлефон і ноўтбук, якія трэба падсілкоўваць, гэта стварае некаторыя нязручнасці. Але і тут студэнты маўчаць. Цікава, што скажуць турысты?

Калі ж заўзятар надумае пайсці ў прыбіральню, там яго можа чакаць чарговы сюрпрыз: іх проста немагчыма зачыніць. Кожны блок зачыняецца на ключ, а вось у туалетах і ванных пакоях замкоў няма. Замежнікам варта параіць узяць на ўзбраенне тэхніку студэнтаў: тыя вызначаюць занята альбо свабодна па тым, ці гарыць святло ў прыбіральні.

Разабраўшыся з святлом у лазанцы і распісаўшы чаргу на падзарадку ноўтбука, госці Мінска могуць зазірнуць у лядоўню, якімі таксама ўзброеныя інтэрнацкія пакоі. Але і тут не ўсё проста. Летась вельмі шмат лядоўняў паламалася. Прыехаў майстар з завода і сказаў не вінаваціць студэнтаў, маўляў, завадскі брак. Тэхніку замянілі, але студэнты ў гэтым годзе падпісалі пагадненне, што, калі нешта зламаецца, то цяпер яны будуць рамантаваць гэта за ўласны кошт. Ці будзе падпісанае адпаведнае пагадненне з замежнымі турыстамі, пакуль невядома.