Гісторыю могуць прыбраць з ЦТ

Міністр адукацыі Сяргей Маскевіч заявіў, што незадаволены вынікамі школьнікаў на ЦТ і падтрымаў ідэю сенатара Рубінава аб адмове ад некаторых цэнтралізаваных тэстаў.

«Сёлетнія вынікі ЦТ мяне не задавальняюць, найперш па фізіцы, матэматыцы. Асноўная маса хлопцаў і дзяўчат, што прэтэндуюць на атрыманне вышэйшай адукацыі, неадэкватна ацэньваюць свой узровень ведаў», — завіў Маскевіч у інтэрв’ю БТ.

Таксама міністр пракаментаваў прапанову спікера вышэйшай палаты парламенту Анатоля Рубінава скараціць колькасць дысцыплінаў, па якіх здаюцца тэсты ў час паступлення ў ВНУ.

«Я лічу, што неабходна зменшыць колькасць прадметаў на цэнтралізаваным тэставанні, згрупаваць спецыяльнасці па накірунках, каб іх больш уніфікаваць».

Маскевіч прывёў прыклад гісторыі (не ўдакладняючы, сусветную ці гісторыю Беларусі ён мае на ўвазе), якая «па сутнасці тая самая спецыяльнасць, што і грамадствазнаўства».

«Пытанні дублююцца, а здаюць як два прадметы, — абурыўся Сяргей Маскевіч. — Ёсць над чым папрацаваць і што ўніфікаваць. Думаю, у новай рэдакцыі правілаў прыёму гэтыя змены знойдуць адлюстраванне».

З 14 да 7

Новыя правілы будуць абмяркоўвацца ўсю восень, таму абітурыентам 2013 году спаць спакойна не дадуць. Верагодна, што колькасць прадметаў на ЦТ праз год скароціцца ўдвая: з 14 да 7.

«14 прадметаў — гэта шмат. Навошта такая дэталізацыя? — разважаў за некалькі дзён да заяваў Маскевіча Анатоль Рубінаў. — Ёсць базавыя прадметы, іх трэба ведаць. Можна іх як мінімум у два разы скараціць».

Галоўны агучаны аргумент для такога змяншэння дысцыплінаў- надта вялікі кошт правядзення тэстаў. Сусветную гісторыю сапраўды здаюць вельмі мала чалавек. Сёлета такіх было 1.74 тысячы. Грамадствазнаўства здавалі болей за 9 тысячаў абітурыентаў, гісторыю Беларусі — у 2 разы болей.

Яшчэ адзін метад эканоміі: прыбраць з ЦТ дубляванне прадметаў на беларускую. Здаюць на ёй усё меней і меней абітурыентаў...

Аднак змяншэннем прадметаў на ЦТ у Мінадукацыі, гледзячы па ўсім, не абмяжуюцца. Сяргей Маскевіч спадзяецца ажыццявіць сваю даўнюю мару: прыбраць «вясковыя» льготы пры паступленні. Гэта хацелі зрабіць яшчэ цягам сёлетняй кампаніі, аднак, верагодна, у міністра не хапіла рэсурсаў на прасоўванне рашэння. Падумваюць і над тым, каб пазбавіць пераможцаў алімпіядаў магчымасці паступаць без конкурсу на некаторыя спецыяльнасці.

Не першы год абяцаюць скараціць набор завочнікаў (аднак сёлета да 70% прыватных ВНУ — зноўку завочнікі), перавесці ўступную кампанію ў электронную форму (гэта таксама абяцалі зрабіць у 2012 годзе). Адзінае навацыя, якая пакуль атрымалася ў Маскевіча — ўсталяванне праходнага балу па ЦТ. У выніку мяжу ў 7 балаў не здолелі пераадолець амаль 20 тысячаў чалавек.