На «зялёнай мапе» Менску — больш за 170 месцаў, у якіх дапамогуць пазбавіцца ад непатрэбных рэчаў

Запушчаная першая ў Беларусі інтэрнэт-мапа, якая дапаможа пазбавіцца ад непатрэбных рэчаў: ад шкла ці паперы да батарэек і тэлевізараў. Неўзабаве такая мапа выйдзе і для Гародні.

На «Зялёнай мапе» пазначаныя тры катэгорыі рэчаў, якія можна здаць у Менску: другасная сыравіна, небясьпечныя адкіды і непатрэбныя рэчы. Дастаткова зазірнуць у яе, каб даведацца аб бліжэйшым да вас месцы, дзе прымаюць, да прыкладу, адпрацаваўшыя лямпы, аўтаадкіды і нават прачытаныя кнігі з газэтамі.

Фрагмэнт Зялёнай мапы Менска

«Другасную сыравіну, як напрыклад шкло ці паперу важна зьбіраць: яна потым перапрацоўваецца беларускімі заводамі», — тлумачыць намесьнік старшыні Цэнтру экалягічных рашэньняў па праграмнай дзейнасьці Яўген Лабанаў.

«А вось што тычыцца адкідаў, тут усё складаней. Напрыклад, батарэйкі — іх пераапрацоўка яшчэ не вядзецца ў Беларусі, пакуль што мы іх толькі зьбіраем. Але мяркую, альбо будзе будавацца завод у межах Мытнага зьвязу, альбо мы іх будзем адпраўляць за мяжу. Пакуль яны толькі захоўваюцца на складах».

З бытавой тэхнікай яшчэ складаней, бо не арганізаваная нават ладная сыстэма збору бытавой тэхнікі.

«Калі мы паглядзім на мапу, то можам убачыць, што пунктаў прыёму другаснай сыравіны ў нас дастаткова шмат, а вось што наконт небясьпечных адкідаў — нам ёсьць куды разьвівацца».

Стваральнікі мапы — Цэнтар экалягічных рашэньняў (ЦЭР) — падгледзелі яе ідэю ў расейскага Грынпіса, расшырылі і дадалі новыя функцыі. Хутка мусіць зьявіцца такая мапа і для Гародні.

«Мы адкрытыя для супрацоўніцтва, — кажа спадар Лабанаў. — Калі зьявяцца ахвочыя зь іншых гарадоў, безумоўна, мы падтрымаем ініцыятыву, але пакуль што з намі зьвязаліся толькі актывісты з Гародні».

Сайт зялёнай мапы Менску першапачаткова быў зроблены такім чынам, каб усе ягоныя наведвальнікі маглі самі дадаваць інфармацыю. Новы кантэнт правяраецца актывістамі ЦЭР, таму недакладнасьцяў быць не павінна.