Сёньня тысячы хлопцаў забяруць у войска

Рэкордную колькасьць прызыўнікоў адправяць бліжэйшымі днямі ў беларускае войска. Цягам наступных тыдняў служыць адправяцца каля 9 тысячаў хлопцаў — амаль у два разы болей, чым у папярэднія гады.

Рост колькасьці прызыўнікоў у ваенкаматах тлумачаць новымі правіламі прызыву: цяпер ён будзе адбывацца ня ўлетку і ўзімку, як раней, а ўвосень і вясною. Праўда, цягам лістападаўскага прызыву — першага, што праходзіць па новых стандартах, — замест меркаваных 12 тысячаў атрымалася набраць 11 тысяч прызыўнікоў.

Зь іх 9 тысячаў — тыя, хто адправяцца на тэрміновую службу (для хлопцаў з вышэйшай адукацыяй яна цягнецца 12 месяцаў, для астатніх — 18). Да службы ў рэзэрве прыцягнуць 2 тысячы чалавек.

Амаль кожны другі прызыўнік атрымлівае адтэрміноўку ад войска для працягненьня адукацыі, і толькі кожны дзесяты хлапец — праз дрэннае здароўе.

Ня ўсім падабаецца цяперашні імідж беларускага войска

Сярод суседзяў Беларусі толькі Расея не плянуе адмяняць тэрміновы прызыў у войска. У Польшчы, Літве і Латвіі яго даўна няма, а Ўкраіна плянуе адмовіцца ад прызыву цягам бліжэйшых гадоў.