Фільм пра беларускую прыроду названы адным зь лепшых на буйнейшым фэсьце

Фільм «Радыёактыўныя ваўкі» пра прыроду беларускіх земляў, забруджаных радыяцыяй пасьля выбуху на Чарнобылі, названы адным зь лепшых на міжнародным фэстывалі фільмаў аб дзікай прыродзе ў ЗША.

Кадр зь фільму «Радыёактыўныя ваўкі»

Фільм «Радыёактыўныя ваўкі», зьняты міжнароднай кінакамандай пад кіраўніцтвам аўстрыйскай кінакампаніі EPO Film, па заказе трох каналаў з ЗША, Аўстрыі і Нямеччыне, узяў адзін з 12 прызоў прэстыжнейшай кінапрэміі Jackson Hole Wildlife Film Festival. Фэстываль праходзіў у ЗША на мінулым тыдні.

Jackson Hole Wildlife Film Festival ня мае аналягаў у сьвеце. На ім паўтысячы спэцыялістаў штогод з 1991 абіраюць 12 лепшых фільмаў аб дзікай прыродзе з 800 прэтэндэнтаў. У фэстывалі ўдзельнічае звычайна каля 50 краін. «Радыёактыўныя ваўкі» ўзялі першы прыз у намінацыі «лепшая праграма пра асяродзьдзе дзікай прыроды», паведамляе birdwatch.by.

Кадр зь фільму «Радыёактыўныя ваўкі»

Па-беларуску і па-воўчы

Здымкі 52-хвіліннай стужкі праходзілі на тэрыторыі Палескага радыяцыйна-экалягічнага запаведніку, пераважна на беларускай яго частцы. Галоўныя героі фільму — ваўкі, а таксама людзі, што назіраюць за імі. Найперш гэта навуковец, прафэсар Акадэміі навук Беларусі Вадзім Сідаровіч. Гэты чалавек вывучае нашу прыроду шмат гадоў. У фільме ён размаўляе па-беларуску, па-ангельску і па-воўчы. Апошняй мовай ён карыстаецца, каб прывабіць ваўкоў дзеля вывучэньня.

Дзеля сапраўды ўнікальных кадраў, якія дэманструюць схаваны ад большасьці людзей дзікі сьвет поўдня Беларусі (доступ ў запаведнік забаронены неспэцыялістам), здымачная група паўгода правяла на Палесьсі. За гэты час яна здолела зьняць такіх унікальных жывёлаў, як ласі, зубры, дзікія коні, кабаны і казюлі. Усе яны расьсяліліся на землях, забруджаных у 1986 годзе радыяцыяй. Аднак, як канстатуюць навукоўцы, жыцьцё на забруджаных землях моцна не паўплывала на іх жыцьцядзейнасьць. Хаця высновы канешне рабіць яшчэ зарана.

Кадр зь фільму «Радыёактыўныя ваўкі»

Кадр зь фільму «Радыёактыўныя ваўкі»

Невядома, калі фільм можна будзе паглядзець у Беларусі на вялікім экране, але яго расейскамоўная вэрсія, паказаная на БТ улетку, даступная на YouTube.