Нямецкія прафэсары не спраўляюцца з наплывам студэнтаў

Нямецкія ўнівэрсытэты не вытрымліваюць наплыву студэнтаў, што утварыўся праз узрослую колькасьць жадаючых вучыцца, адукацыйную рэформу і адмену прызыву.

Нямецкія студэнты з унівэрсытэту Франкфурта-на-Одэры маюць па аднаму прафэсару на 50 навучэнцаў

Як паведамляе выданьне Welt са спасылкай на даклад кансалтынгавай кампаніі CHE Consult, нямецкія прафэсары турбуюцца за якасьць адукацыі з-за павелічэньня колькасьці студэнтаў. Унівэрсытэты вымушаныя пашыраць прафэсарскія працоўныя гадзіны і наймаць пазаштатных супрацоўнікаў, што негатыўна адбіваецца на якасьці адукацыі і навуковай працы, на якую ў прафэсараў застаецца мала часу.

«Наша сыстэма арыентаваная на высокакваліфікаваных прафэсараў, якія, такім чынам, зьяўляюцца каштоўнымі выкладчыкамі, — адзначыў у сувязі з гэтым кіраўнік CHE Consult Крысьціян Бэртхальд (Christian Berthold). — Няма нічога добрага ў тым, калі большую частку іх часу будзе займаць выкладаньне».

У 2007 годзе на аднаго прафэсара ў сярэднім прыходзілася па 51 студэнту. У 2010 годзе гэты паказчык узрос да 53.5. Найбольш напружаная сытуацыя склалася ў трох фэдэральных землях: Паўночным Рэйне-Вэстфаліі, Гессэне і Рэйнланд-Пфальцы: на аднаго прафэсара там прыходзіцца 65.6 студэнты.

З 2013 года становішча ў гэтых трох землях можа пагоршыцца шматкроць: колькасьць абітурыентаў узрасьце ўдвая за кошт скарачэньня тэрмінаў навучаньня ў гімназіях з 9 да 8 гадоў. Акрамя гэтага, ужо ў самы бліжэйшы час колькасьць студэнтаў павялічыцца праз адмену прызыву ў нямецкае войска.

Па прагнозах CHE Consult, тэндэнцыя павелічэньня колькасьці студэнтаў захаваецца ў бліжэйшыя 15 гадоў, пакуль зноў ня зьнізіцца ніжэй за два мільёны. У зімовы сэмэстар 2010 года ў ВНУ вучыліся 2.2 мільёны студэнтаў, на 234 тысячы болей, чым у папярэднім годзе.

У Беларускі толькі 450 тысячаў студэнтаў, аднак па колькасьці студэнтаў на 10 тысячаў жыхароў мы значна абганяем Нямеччыну: там на 10 000 чалавек прыходзіцца толькі 277 студэнтаў, а вось у нас цэлых 467.