Самая першая ў сьвеце рок-н-рольная песьня

Песьня Артура Крадапа па мянушцы «Біг Бой» That’s All Right Mama («Усё ў парадку, мама») названая самай старэйшай рок-н-рольнай песьняй ў сьвеце на думку гісторыка рок-музыкі з амэрыканскага ўнівэрсытэту Луізыяны. Музыка запісаў песьню 6 верасьня 1946 году на студыі Victor Records.

Вось як тлумачыць гісторык Джозэф Бёрнс, што такое рок-н-рол на ягоную думку:

«Рок-н-рол — гэта музыка, якая спалучае ў сабе наступныя складнікі:

• Блюзавая пасьлядоўнасьць акордаў, асаблівыя мэлядычныя лініі і дамінаваньне струнных інструмантаў, што характэрна для стылю «кантры», а таксама танцавальнасьць, якая пазьней стала асновай поп-музыкі;
• Рытмічная структура джазу і бугі-вугі, вакальны ўплыў гаспэлу альбо сацыяльная накіраванасьць песень, што вылучае фольк-музыку.
• Пэўны ўплыў сучасных тэхналёгіяў».
  

«Усё нармальна, мама» добра вядомая ва ўсім сьвеце, у Беларусі яе перасьпявалі многія — ад Васі Шугалея да «Крамбамбулі»

Такім чынам, Бёрнс перакананы, што песьня Артура Крадапа That’s All Right Mama найбольш адпавядае ўсім азначым ім рысам рок-н-ролу. Да таго ж, у ёй ужытае першае ў сьвеце гітарнае сола. Таксама многія экспэрты называюць гэтую песьню «самай уплывовай у ХХ стагодзьдзі». Яна ж стала першым гітом Элвіса Прэсьлі, які паклаў пачатак рок-н-рол-рэвалюцыі.

Шэдэўр Крадапа прафэсар лічыць самым рок-н-рольным і самым першым. Сярод іншых прэдэндэнтаў на першынства былі:

• How High the Moon Леса Пола і Мэры Форд
• The Honey Dripper Джо Лігенса
• Boogie Chllen' Джона Лі Хукера
• Saturday Night Fish Fry Луіса Джордана
• The Fat Man Фэтса Даміно
• (We’re Gonna) Rock Around the Clock Біла Хэйлі і The Comets
• Rocket 88 Джэкі Брэнстана і ягонага ансамблю Delta Cats.