Італійскія студэнты будуць вывучаць гісторыю мафіі

Студэнты рымскага ўнівэрсытэту Tre з пачатку 2005 году будуць вывучаць гісторыю мафіі, паведамляе брытанская газэта Telegraph.

У межах новага навучальнага курсу, разьлічанага на тры месяцы, студэнты вывучаць нараджэньне ў XIX ст., разьвіцьцё і сучасны стан мафіі. Асаблівую ўвагу будуць надзяляць пачатку 90-х гадоў XX-га ст., калі супрацьстаяньне мафіі ды дзяржавы дасягнула найвялікшага маштабу.

"Гэта першая спроба настолькі сыстэмнага вывучэньня феномена мафіі, - заявілі прадстаўнікі ўнівэрсытэту. - Да гэтага моманту тэма мафіі лічылася табу для абмеркаваньня".

Чытаць лекцыі студэнтам запрошаныя буйныя спэцыялісты па барацьбе з мафіяй, у тым ліку, нацыянальны пракурор Італіі па барацьбе з мафіяй Пьера Луіджы Вінья (Pier Luigi Vigna).

Курс гісторыі мафіі мае вялікую папулярнасьць сярод студэнтаў, больш за 430 чалавек выказалі жаданьне яго праслухаць. Пасьля заканчэньня лекцыяў яны будуць здаваць іспыт.