Арганізатары «Басовішча» абвесьцілі дату наступнага фэсту за 9 месяцаў

Арганізатары «Басовішча» зьдзіўляюць — упершыню дата фэстывалю вызначылася ня ўвесну, а за сымбалічныя 9 месяцаў. Нараджэньне 22-га «Басовішча» пройдзе 22–24 ліпеня 2011 году ў традыцыйным Гарадку ў Польшчы недалёка ад беларускай мяжы.

«Пэўна ўсе яшчэ жывуць ўспамінамі з сёлетняга фэстывалю, але мы не губляем часу і ўжо думаем пра наступны!» — абвяшчаюць сябры «Беларускага аб’яднаньня студэнтаў» у Польшчы, якія штогод ужо ў 22-і раз ладзяць самы стары фэстываль музыкі маладой Беларусі.

А для напаміну пра фэст гэтага году даступнае настраёвае 10-хвіліннае відэа з Басовішча-2010.

«Басовішча» пачыналася як фэстываль беларускай музыкі для мясцовых этнічных беларусаў у Польшчы, аднак нягледзячы ці дзякуючы пастаяннай зьмене арганізатараў са складу студэнцкага аб’яднаньня ды іроніі лёсу ня толькі стала самым буйным штогадовым беларускім оўпэн-эйрам канца 90-х — першай паловы 2000-х, але працягваецца й цяпер, калі беларуская музычная сцэна абзавялася некалькімі новымі фэстамі. Традыцыйна фэстываль праходзіць у другой палове ліпеня і зьяўляецца адной з самых знакавых летніх падзеяў беларускага музычнага жыцьця. У хэдлайнэрах фэсту значыліся самыя знакавыя фігуры беларускага андэграўнду: NRM, Krama, Neuro Dubel, Ulis, а гэтым годам «Ляпіс Трубяцкой». А ў творчых біяграфіях многіх маладых гуртоў значыцца перамога на «Басовішчы».