Віталь Артыст стане асабістым шафёрам для прыхільніка

7 лістапада можна будзе ўбачыць, як да канцэртнай залі «Мінск» пад’едзе аўтамабіль зь Віталём Артыстам за стырном і аўтарам лепшага фан-відэа на песьню «Без Билета» ў якасьці пасажыра. Да гэтага лідэр «безьбілетнікаў» пад’едзе наўпрост да пад’езду, у якім жыве прыхільнік, альбо сустрэне яго на вакзалі. Творчы конкурс аматарскіх кліпаў гурт абвясьціў напярэдадні свайго штогадовага сьвята Дзень Безьбілетніка.

Без Билета 2010. Аўтар фота Таня Кушнер.

Асновай для відэа можа стаць любая песьня «Без Билета». Гэта можа быць як змантаваны, так і зьняты на мабільны тэлефон ці відэакамэру ролік. Для ўдзелу ў конкурсе неабходна даслаць спасылку на загружаны ў YouTube файл на электронны адрас bezbileta.net (сабака) gmail.com з пазнакай «фан-відэа» ў тэме ліста. Зрабіць гэта трэба не пазьней за 1 лістапада, а пераможцу гурт назаве 5 лістапада.

«Дзень Безьбілетніка 2010 — гэта мерапрыемства, якое нельга прапусьціць. Пры асаблівым жаданьні можна патрапіць туды без квітка, і даехаць без жэтона, — кажа Віталь Артыст. — Голым пры месяцы таньчыць не абяцаю, але зь ветрыкам і музыкай на „антылопе“ пракачу!»

Калі ж пераможца конкурсу ня зможа прысутнічаць на канцэрце, будзе арганізавана яго відэаканфэрэнцыя з Артыстам па скайпу.