Віктар Малішэўскі трапіў у лепшыя блогеры сьвету

Блог беларускага журналіста Віктара Малішэўскага трапіў у лік фіналістаў штогадовага конкурсу The Best of Blogs, які ладзіцца медыякампаніяй Deutsche Welle. Былы намесьнік рэдактара «Комсомольской правды» прэтэндуе на перамогу ў намінацыі «лепшы блог на рускай мове».

Віктар Малішэўскі завёў блог на плятформе Livejournal толькі два гады таму

Вылучэньне ў сьпіс лепшых стала нечаканасьцю для Віктара Малішэўскага. Сам ён на конкурс не вылучаўся, паведамляе Еўрарадыё.

Спадар Малішэўскі вядзе блог на платформе Livejournal зь лістападу 2007 года, дзе «трапна і з гумарам камэнтуе палітычныя рэаліі сучаснай Беларусі, якія нярэдка мяжуюць з абсурдам», — адзначаецца на сайце конкурсу.

The Best of Blogs (The BOBs) мае 17 намінацый, у кожнай зь іх папярэдне былі выбраныя па 11 фіналістаў. Як і ў мінулыя гады, ва ўсіх катэгорыях будуць названыя па два пераможцы — па вэрсіі карыстальнікаў і па вэрсіі журы. Галасаваньне карыстальнікаў ужо распачатае на сайце прэміі і працягнецца да 14 красавіка.

Як паведамляе Deutsche Welle, за званьне найлепшых спаборнічаюць блогі і падкасты на 11 мовах: рускай, англійскай, нямецкай, французскай, гішпанскай, партугальскай, бэнгальскія, пэрсыдзкай, інданэзійскай, кітайскай і арабскай. Акрамя моўных катэгорый, пераможцы будуць абвешчаныя ў шасьці міжнародных намінацыях: «лепшы блог», «лепшы відэаблог», «лепшы падкаст», «самы незвычайны блог», «спэцыяльны прыз», «праблемы зьмяненьня клімату» і «прыз арганізацыі "Рэпарцёры бязь межаў"».

На перамогу ў інтэрнэт-галасаваньні Віктар Малішэўскі не разьлічвае, але спадзяецца на прафэсійнае журы:

«Я разумею, што выйграць карыстальніцкае галасаваньне ў прынцыпе немагчыма, бо там канкурэнты — супольнасьці, у якіх шмат блогераў. А вось пазмагацца за перамогу ў конкурсе журы — цалкам магчыма. Пагатоў што яна лічыцца больш прэстыжнай», — кажа беларускі блогер.

Такім чынам апошняе слова застанецца за міжнародным журы, якое складаецца з аўтарытэтных блогераў і інтэрнэт-экспэртаў з 11 краін. Яны сустрэнуцца з 12 па 15 красавіка ў Бэрліне, каб выбраць пераможцаў прэміі. Рускамоўную блогасфэру ў гэтым годзе прадстаўляе блогер drugoi. Пераможцы The BOBS-2010 будуць абвешчаныя 15 красавіка ў Бэрліне.

На конкурс было прадстаўлена 67 блогаў зь Беларусі — усе, адпаведна з умовамі конкурсу, рускамоўныя. Менскіх блогаў сярод іх 39. Агулам на ўдзел у The BOBs сёлета было пададзена 8300 заявак.

У 2007 годзе блог беларускай журналісткі Ксеніі Авімавай «Фотаграфаманства» быў названы лепшым па вэрсіі The BOBs. А ў 2008 годзе на конкурсе перамог блог кубінскай дысыдэнткі Ёані Санчэс «Пакаленьне Y».

Фота Юра Сідун