70% працадаўцаў могуць адхіліць рэзюмэ з-за адмоўнай он-лайн рэпутацыі кандыдата

Пошукі працы могуць завершыцца нічым на падставе непрыстойных фотак з вашым удзелам у «VK» альбо сьцяны ў Facebook, запоўненай брыдкаслоўямі. Такія вынікі дасьледаваньня меркаваньняў экспэртаў у Эўропе і ЗША прадставіла кампанія Microsoft.

Дасьледаваньне, праведзенае сярод спэцыялістаў па найму, а таксама наведвальнікаў Сеціва ў ЗША, Францыі і Нямеччыне выявіла, што значная частка насельніцтва гэтых краін не разумее, якім чынам іх паводзіны ў Інтэрнэце, профіль у сацыяльных сетках і іншыя атрыбуты жыцьця звычайнага карыстальніка могуць адбіцца на прафэсійнай кар’еры.

Так, 70% спэцыялістаў, якія займаюцца пошукам людзей для працы, дапускаюць, што могуць адхіліць рэзюмэ на падставе дрэннай сеціўнай рэпутацыі патэнцыйнага супрацоўніка. У той жа момант каля 60% карыстальнікаў Сеціва лічыць, што іх рэпутацыя ў Інтэрнэце можа адбіцца на кар’еры. І толькі 15% зь задумваюцца над гэтым перад тым, як посьціць нешта ў глябальным павуціньні.

Хаця ёсьць у дасьледчыкаў і станоўчая інфармацыя: абсалютная большасьць спэцыялістаў па пошуку кадраў лічыць, што добрая он-лайн рэпутацыя можа мець значны эфэкт пры разглядзе кандыдатаў на тую ці іншую пасаду. А каля паловы HR-мэнэджэраў кажуць, што такая рэпутацыя можа мець вырашальны эфэкт.

Таму адмаўляцца ад сацыяльных сетак таксама ня варта. Як піша Пітэр Кулэн (Peter Cullen), што адказвае ў Microsoft за пытаньні бясьпекі асабістай інфармацыі, «он-лайн рэпутацыя — гэта ня тое, чаго трэба баяцца. Гэта нешта, чым можна актыўна кіраваць». Таму ён настойліва заклікае вэб-карыстальнікаў ствараць такую «он-лайн рэпутацыю, якую, на ваш погляд, хоча бачыць працадаўца».

Паводле Microsoft Privacy & Safety