Сьвіны грып зьнішчае амазонскае племя

Сьвіны грып ужо забіў 7 прадстаўнікоў ізаляванага племені з басэйну Амазонкі. Сотні інфіцыраваныя. Над племенем навісла пагроза зьнішчэньня.

Прадстаўніца племені Янамамі. Фота Survival International

Пакуль з усяго сьвету прыходзяць зьвесткі аб новых ахвярах сьвінога грыпу, стала вядома пра сапраўдную пагрозу, якая сыходзіць ад вірусу H1N1. Цэламу племені пагражае зьнікненьне з-за злашчаснага вірусу, які дабраўся да мяжы Вэнэсуэлы і Бразыліі, дзе пражывае адно з самых вялікіх ізаляваных плямёнаў дажджавых лясоў Амазонкі.

Сем прадстаўнікоў племені Янамамі (Yanomami) ужо памерлі, яшчэ тысяча магчыма інфіцыраваныя. Сытуацыя крытычная, паколькі ў Янамамі аслаблены імунітэт да захворваньняў, заяўляюць прадстаўнікі міжнароднай арганізацыі Survival International.

Вэнэсуэльскія ўлады ўжо адправілі ў джунглі групу мэдыкаў, якая мусіць заняцца праблемаю. Прадстаўнікі групы апасаюцца хуткага распаўсюду вірусу сярод ізаляванага племені. Survival International патрабуе неадкладных мераў у барацьбе з эпідэміяй.

Па словах прадстаўнікоў арганізацыі, сярод памерлых з-за грыпу індзейцаў была адна цяжарная і трое дзяцей, перадае BBC.

Племя толькі нядаўна адправілася ад эпідэміі, якая атакавала Янамамі 20 гадоў таму. Тады малярыя, занесеная ў джунглі гарнякамі, забіла кожнага пятага Янамамі, які жыў на тэрыторыі Бразыліі. Цяпер у сьвеце засталося толькі 32 000 прадстаўнікоў выміраючага племені.

Вірус H1N1, вядомы як сьвіны грып, распаўсюдзіўся па ўсім сьвеце і стаў прычынай сьмерці каля 5 000 чалавек. У Беларусі ахвярамі H1N1 сталі сем чалавек.