Euro-2012: беларускіх заўзятараў таксама чакаюць

Да чэмпіянату Эўропы па футболе яшчэ 3 гады, але жарсьці вакол спаборніцтва не сьціхаюць з моманту абраньня яго гаспадароў. То ўкраінскія алігархі дамовіцца ня могуць, то міністар спорту Польшчы «праштрафіцца». Аб польскіх гатэлях, візах для беларусаў і данецкіх алігархах распавёў Generation.bY прэс-сакратар польскіх арганізатараў Euro-2012 Юліюш Глускі.

Лёс чэмпіянату вырашаецца ў «някіслым» хмарачосе ў самым цэнтры Варшавы. Менавіта тут разьмешчаная адмыслова створаная UEFA недзяржаўная структура Euro-2012 Poland, якая адказвае за польскую частку спаборніцтва.

Нагадаю, што ў 2012 г. спартовае сьвята з самай вялікай у Эўропе фанацкай аўдыторыяй пройдзе адразу ў дзьвюх краінах: Польшчы і Ўкраіне. І там, і там ужо поўнай хадой ідзе падрыхтоўка, якая зь дзіўнай рэгулярнасьцю суправаджаецца пэрманэнтнымі скандаламі.

Сярод апошняга — звальненьне польскага міністра спорту, які ня вытрымаў абвінавачваньняў у прасоўваньні інтарэсаў пэўных прадпрыемстваў. Ня вытрымаў настолькі, што зьбег з уласнай прэс-канфэрэнцыі.

Рэканструкцыя стадыёну ў Варшаве. Фота www.poland2012.net

А ва Ўкраіне пакуль толькі адзін Кіеў атрымаў права прымаць матчы «Еўра-2012». Данецк, Львіў і Харкаў да 30 лістападу павінныя паказаць, што выконваюць графік падрыхтоўчых прац, у адваротным выпадку яны пазбавяцца права прымаць матчы. І з гатэлямі ва Ўкраіне праблемы, і фінансаваньне трэба было ледзь не з баямі праз Вярхоўную Раду працягваць, а тут яшчэ данецкага будаўніка ў Львіве зьбілі.

UA — PL

У цэлым стасункі між украінскімі і польскімі арганізатарамі прыязныя, бо паўнамоцтвы ў абодвух бакоў аднолькавыя, а абавязкі строга падзеленыя тэрытарыяльна.

«Чым можам, мы ім дапамагаем, чым могуць — яны нам», — кажа на абсалютна чыстай расейскай прэс-сакратар польскага боку аргкамітэту Euro-2012 Юліюш Глускі.

Па яго словах, адной зь перавагаў жоўта-блакітных сталася, як ня дзіўна, наяўнасьць алігархаў, з дапамогай якіх апэратыўна будуецца шэраг элемэнтаў будучага чэмпіянату. Сярод найбольш вядомых — па некаторых ацэнках лепшы ў Эўропе стадыён у Данецку, які паўстаў дзякуючы «сьціпламу» ўнёску Рыната Ахметава.

«Але алігархі не будуюць дарог. У нас жа алігархаў няма, таму стадыёны будуе дзяржава. Тыя ж багатыя людзі, што ёсьць, наадварот пад чэмпіянат пракладаюць платныя магістралі, хаця й сумнеўнай якасьці», — кажа прэс-сакратар.

Стадыён у Данецку, які нядаўна быў афіцыйна адкрыты. Фота www.poland2012.net

Валантэрствам — па бездарожжу!

Без валантэраў на чэмпіянаце нікуды. Але ва Ўкраіне пакуль не распрацаваная сыстэма добраахвотнай дамапогі, у той час як у Польшчы ўжо маецца пэўны штат, таму апошнія кансультуюць першых. У лік валантэраў, дарэчы, можа патрапіць любы ахвочы. Далейшыя інструкцыі па рэкрутаваньню спадар Глускі раіць шукаць на афіцыйным сайце UEFA.

Праект стадыёну ў Гданьску. Фота www.poland2012.net

Вядома, польскія гатэлі ня супраць браніраваць месцы і прымаць гасьцей і удзельнікаў эўрапейскага чэмпіянату па футболе. Але ніяк не за тры гады да падзеі. Хто ведае, што будзе з курсам эўра? А з коштамі на энэргію? А раптам зноў які крызыс? А вось рапартаваць у галаўны офіс UEFA ў Ньёне аб дамоўленасьцях па гэтых пытаньнях трэба ўжо зараз.

Вялікая палітыка, вялікая эканоміка

Прычынаў для незадаволенасьці падрыхтоўкай да правядзеньня чэмпіянату ў палякаў, па завярэньню спадара Глускага, няма. Старасьвеччыну пасярод гарадоў з гэтай нагоды ніхто не руйнуе, дрэвы не высякаюць і брук экскаватарам не падымаюць. Наадварот, актывізавалася будаўніцтва шляхоў зносінаў, у чым эўразьвязаўскія грошы дазваляюць пачуваць сябе досыць упэўнена.

На рэканструкцыю толькі футбольнага стадыёну ў сталіцы Польшчы пайшло 2 млрд. злотых ($700 млн.). А яшчэ плянуецца дабудаваць тэрміналы ў варшаўскім і познаньскім аэрапортах, запусьціць новыя веткі мэтро, адчыніць памежныя пераходы, аптымізаваць транспартную сувязь паміж вакзаламі і спартыўнымі аб’ектамі.

Карту Euro-2012 ужо разыгрываюць некаторыя палітыкі, хаця ня ўсе аднолькава пасьпяхова, як гэта паказаў прыклад міністра спорту. Цяперашні прэм’ер-міністар Польшчы Дональд Туск, напрыклад, падчас выбарчай кампаніі багата здымаўся на тле стадыёнаў. І грамадзтва, дзе ідэя правядзеньня Euro-2012 паступоваў ператвараецца ў ідэю нацыянальную, не магло гэта не адзначыць.

Візы

Шэнгенскія візы — заўжды хворае пытаньне для ўсіх беларусаў, ад Нарвілішак да Лісабонаў. Наведаць Украіну ў час чэмпіянату ніхто не забароніць, а вось з Польшчай пытаньне дагэтуль няяснае. Вырашэньне яго ляжыць выключна ў кампэтэнцыі Міністэрства замежных спраў. А рэкамэндацыі Euro-2012 Poland адназначныя: госьці стадыёнаў чэмпіянату Эўропы па футболе мусяць мець вольны доступ у краіну правядзеньня спаборніцтваў. Спадар Глускі запэўнівае, што беларусаў ён вельмі хацеў бы тут бачыць. На што можна толькі адказаць: «Абы было, за каго хварэць».

Сустрэча адбылася ў межах візыту «Польшча 89’ — Беларусь 91’ — нераўназначныя зьмены», арганізаванага Цэнтрам міжнародных стасункаў у Варшаве.