Мітрапаліт Філарэт прапануе рэгуляваць Інтэрнэт па прыкладзе Кітаю

«Інтэрнэт, які зьяўляецца расчыненымі дзьвярыма ў сьвет, валодае магутным уплывам на сьвядомасьць людзей», — зазначыў мітрапаліт на сустрэчы Лукашэнкі з прадстаўнікамі праваслаўнай царквы. «Неабходна дзейснае рэгуляваньне інтэрнэт-зьместу на заканадаўчым узроўні».

Мітрапаліт Менскі і Слуцкі патрыяршы экзарх усея Беларусі Філарэт лічыць, што варта скарыстацца досьведам Кітаю:

«Кітайскі досьвед цікавы тым, што адказнасьць за карыстаньне інтэрнэтам ускладзена не на дзяржаву, а ляжыць на тых, хто прадстаўляе доступ да сеткі».

Мітрапаліт спадзяецца, што дзяржава не пакіне праблему «адкрытага доступу да брудных рэсурсаў» без увагі:

«Асноўная пагроза складаецца ў тым, што амаральная інфармацыя стала даступнай самым уразьлівым катэгорыям — дзецям і падлеткам, у якіх псыхіка яшчэ няўстойлівая. Для іх віртуальны хаос вельмі небясьпечны».

Паводле Interfax