«Рэпарцёры бязь межаў» ня ўнесьлі Беларусь у новы сьпіс «Ворагаў Інтэрнэту»

Арганізацыя «Рэпарцёры бязь межаў» ужо другі год ладзіць 12 сакавіка Дзень свабоды слова ў Інтэрнэце. З гэтай нагоды на сайце арганізацыі апублікаваны сьпіс 12 краінаў, дзе Сеціва найбольш абмежаванае па палітычных прычынах. Беларусь сёлета выпала з гэтага сьпісу.

Аднак разам зь яшчэ шэрагам краінаў мы трапілі ў «сьпіс назіраньня».

«Ворагамі Сеціва» па вэрсіі «Рэпарцёраў бязь межаў» зьяўляюцца:

• Бірма,
• Віетнам,
• Егіпет,
• Іран,
• Кітай,
• Куба,
• Саудаўская Аравія,
• Паўночная Карэя,
• Сірыя,
• Туніс,
• Туркмэністан і
  
• Узбэкістан.

У сьпіс краінаў, якія знаходзяцца пад асаблівым назіраньнем абаронцаў  свабоды слова, акрамя Беларусі трапілі

• Аўстралія,
• Бахрэйн,
• Зімбабве,
• Емэн,
• Малайзія,
• Аб’яднаныя Арабскія Эміраты,
• Тайлянд,
• Шры-Ланка,
• Эрытрэя і
• Паўднёвая Карэя.

Гэты сьпіс грунтуецца на плянах урадаў розных краінаў увесьці абмежаваньні ў Сеціве. Так, прыкладам, Аўстралія неўзабаве мусіць запусьціць агульнанацыянальную сыстэму фільтраў. Ня гледзячы на заявы аўстралійскіх чыноўнікаў пра невыкарыстаньне гэтай сыстэмы ў палітычных мэтах, само яе існаваньне будзе супярэчыць прынцыпам Сеціва.

Будучыня свабоды слова для беларускіх карыстальнікаў Інтэрнэту хвалюе «Рэпарцёраў» у зьвязку з выказваньнем чыноўнікаў Міністэрства інфармацыі пра магчымае перайманьне кітайскага досьведу ў фільтраваньні Сеціва. Гэтаксама ў справаздачы адзначаецца блякаваньне шэрагу сайтаў пад час мінулага «Чарнобыльскага шляху» і пасьля яго, пастанова Савета Міністраў ад 10 лютага 2007 года пра рэгуляваньне дзейнасьці інтэрнэт-кавярняў, а таксама новы беларускі закон «Аб СМІ», які, перадае права рэглямэнтацыі онлайн-СМІ Савету Міністраў.