Віцебск культурна ўZьнялі: лепшыя моманты віцебскай сцэны-2008 у віртуальнай фотавыставе

Прайшоў год з таго моманту, як у Віцебску грымнула новая прома-тусоўка. Яе няхітрая назва «NoLogo» зараз стала сынонімам авангардных імпрэзаў у сталіцы самага жабрацкага рэгіёну. П’яныя панкі, кранальныя эмачкі, тру-металюгі, вартая жалю горстка хопераў, тусоўшчыкі старой закваскі, рэйверы на глэме, а таксама безь яго — усе хоць раз дый пабывалі на мерапрыемствах гэтай банды на чале з Броўкай-і-Тоцкім.

На Generation.bY фотавыстава зь лепшых момантаў віцебскай сцэны-2008.

Два прамоўтары ва ўзросьце, «калі ўжо й жаніцца запозна», ніяк ня могуць вырвацца з кола юнацкіх максымалізмаў і неўтаймаванага жаданьня неяк самасьцьвердзіцца.

У гэтым годзе сцэна давала багата нагодаў для нашых герояў, каб нарэшце задаволіць гэты голад. Вечны канфэрансье з конкурсамі, рэклямай і вострасацыяльнымі заклікамі Віталь Броўка, а таксама герой двух гуртоў, рынга стар віцебскага канцэртаводзтва (а ёсьць і такая навука!) Аляксей Тоцкі, калі яшчэ не асядлалі культурніцкага каня, то як мінімум схапілі яго за хвост. З гэтага коніка на рыпучыя дошкі падзьвінскага шоў-бізу злазілі Зьміцер Вайцюшкевіч і Stigamata, Lumen і Нэйра Дзюбель, Лявон Вольскі і Слот, Уладзімер Арлоў і Mauzer, Аляксандр Хадановіч і Animal ДжаZ, I Love You Baby, Бригадный Подряд, Безь Білета, Стары Ольса, Тацьцяна Беланогая і іншыя, іншыя, іншыя.

За гэты ж самы час Броўку аднойчы ледзь не забіла малалетняя фашня, Тоцкага выселялі з чатырох кватэр, а штатны дызайнер Сьцяпан канчаткова сышоў у алькагольную нірвану. Пара нядаўніх залётаў канчаткова перавялі суполішча на хлеб і гарэлку, а тут яшчэ адзін зь іх вырашыў жаніцца… Карацей, тэкст канчаткова зьліваецца з пазытыўнага фармату Generation.by:) Каб давесьці яго да больш узьнёслага фіналу трэба адпісаць наступнае: на партыйным сходзе «ноўлогаўцы» цьвёрда вырашылі падняць карпартыўны тонус, дзеля чаго ў комін Віцебскага мастацкага музэя, а менавіта яго Залю № 0, было закінута паліва найлепшай якасьці — фотаздымкі, калі не сказаць фоташэдэўры, сталых рэпартэраў мерапрыемстваў «NoLogo».

Напрацягу году яны не вылазілі з вар’яцкіх натоўпаў і каляінтэлігенцкіх сходак, напісаўшы непаўторны летапіс культурніцкіх падзей нашага месца. З дапамогай грамадзкай кампаніі «Будзьма!» ідэя была зрэалізаваная ў фізычнай прасторы ў форме фотавыставы «Культурны ўZдым». Амаль дзьве сотні ўсё тых жа панкаў, рэйвераў і старых тусоўшчыкаў прыйшлі на стартавую імпрэзу абмеркаваць мэйк-ап Янкі Маўзэра, дзяўчынак каля сцэны зь Лявонам Вольскім, надрыўную міміку саліста зь Lumen’у і Сашу Кульлінковіча ў вобразе Хрыста (альбо наадварот).

Натуральна, што няўрымсьлівым галовам з «NoLogoPromo» карцела перанесьці увесь свой фотагонар у вэб-прастору.

Такім чынам, сябры,
лепшыя моманты віцебскай сцэны-2008 у фотаблогу.