Блогеры ў ЗША цяпер могуць застрахаваць сваю працу гэтак жа, як і традыцыйныя СМІ

Невыразная мяжа паміж прафэсійнымі блогерамі і традыцыйнымі СМІ працягвае размывацца. Амэрыканская грамадзкая арганізацыя Media Bloggers Association (MBA) прапанавала блогерам аформіць страхоўку ад абвінавачваньняў у паклёпе і ўварваньні ў прыватнае жыцьцё. Такога кшталту страхаваньні раней былі даступныя толькі для традыцыйных СМІ.

Новая праграма недзяржаўнай некамэрцыйнай арганізацыі Media Bloggers Association прапануе блогерам адукацыю ў прававой сфэры і набыцьцё страхаваньня. Умовай для гэтага зьяўляецца толькі ўдзел у MBA, сяброўскія ўнёскі ў якой складаюць 25$ штогод.