Футбольная ліхаманка ў Вене

Зь мінулых выходных для ўсёй Эўропы наступіў пэрыяд футбольнай ліхаманкі. З 7-га па 29-е чэрвеня кожны дзень будуць адбывацца матчы ў межах чэмпіянату па футболе, за якімі будуць сачыць мільёны людзей з розных краінаў. Найбольш моцна ад «ліхаманкі» будуць пакутаваць тыя краіны, якія зьяўляюцца гасьцямі чэмпіянату ў гэты раз — Швайцарыя і Аўстрыя. Як пачатак «хваробы» сустрэла Вена? Фотарэпартаж зь месца падзеяў.

Вена акунулася ў футбольную ліхаманку з галавой. Менавіта ліхаманку, бо пачатак чэмпіянату нельга назваць ніяк іначай. Футбольная сымболіка паўсюль: у вітрынах крамаў, у кожным рэклямным роліку па тэлебачаньні, на вуліцах, нават у пякарнях булкі абсыпаюць цукрам ці мукой у выглядзе шашачак на мячы. Статую, што рэклямуе выставу «Тутанхамон», таксама пераапранулі ў нацыянальную форму аўстрыйскай каманды.

Увесь цэнтар акупаваны фанатамі ў нацыянальных формах, зь перамазанымі тварамі, сьцягамі, сьвісткамі. Калі стаць на якую ціхую вулачку, дзе мала людзей, і заплюшчыць вочы, то чуваць, што горад гудзе. Гул тысячаў людзей на стадыёне падчас гульні можна чуць за кілямэтры ад яго. 

Аўстрыйцы падрыхтаваліся да чэмпіянату грунтоўна. Тысячы валянтэраў, 25 000 дадатковых паліцэйскіх атрадаў у Вене, новыя станцыі мэтро, каб можна было даехаць да самага стадыёну, працяг працы мэтро на гадзіну і шмат іншага.

Можна сказаць, што футбольным фанатам былі аддадзеныя нацыянальныя сымбалі — ратуша, парлямэнт, Хофбург (стары горад) і Пратэр (парк атракцыёнаў са знакавым старым колам агляду).

Менавіта тут, у цэнтры горада, дзе знаходзяцца гэтыя асноўныя для Вены і Аўстрыі наагул будынкі, была пабудаваная грандыёзная па сваіх памерах фан-зона, дзеля якой быў прыпынены рух некаторых трамваяў і аўтобусаў, пастаўленыя дзесяткі вялізных экранаў, узьведзеныя часовыя будынкі vip-трыбунаў і іншыя адметнасьці неабходнай у такіх выпадках інфраструктуры.

Шмат увагі надаецца і бясьпецы, каб пасьля ад'езду фанатаў пасьля чэмпіянату Вена не стала непазнавальнай. Усе жадаючыя трапіць у фан-зону правяраюцца службай бясьпекі, каб у месцы, дзе зьбіраюцца дзесяткі тысяч гледачоў, не пранеслі якой бомбы ці іншай зброі.

На станцыях мэтро ў раёне фан-зонаў знаходзяцца спэцыяльныя супрацоўнікі мэтро, якія кантралююць парадак на станцыях і своечасовае адпраўленьне цягнікоў.

Аўстрыйцы добра прадумалі магчымасьць праяўленьня гвалтоўнай натуры футбольных фанатаў. Страхавыя кампаніі ўвялі магчымасьць страхаваньня ад праяваў вандалізму падчас чэмпіянату. У сродках масавай інфармацыі футбол і вандалізм былі абмеркаваныя з усіх бакоў яшчэ да пачатку гульняў.

Такім чынам, горад, як і большая частка Эўропы, паралізаваныя да канца месяцу, бо ўвечары ўсе імкнуцца да тэлевізараў — хто дахаты альбо ў кавярні і бары, а хто і ў фан-зону, каб сачыць за новай гульнёй у атачэньні тысячаў людзей. Інтрыга моцная, бо ўрэшце рэшт на кану нацыянальны гонар удзельнікаў чэмпіянату!