Сёньня ў «КЗ Менск» вялікі акустычны канцэрт N.R.M.

Упершыню за апошнія тры гады N.R.M. выходзіць на вялікую пляцоўку з акустычнай праграмай, раней гурт граў у такім фармаце хіба што ў «Графіці». Музычная салянка са старых і новых песень, адказы на пытаньні, шчырасьць, сьвечкі, раяль у кустах — што яшчэ чакаецца сёньня на канцэрце, распавёў Generation.bY Лявон Вольскі.

«Будуць песьні з асноўнага рэпэртуару каманды, з апошняга альбому, будуць старыя песьні, а дзьве песьні выканаем пад раяль — «Краіна крывавых дажджоў» і «Халодны блюз», адкапаны зь нетраў зямлі:)»

Таксама прыхільнікі гурта пачуюць «Юра, ёлкі-палкі, Коля!» ў адмысловай аранжыроўцы, «Я нарадзіўся тут» і іншыя. Выканаюць музыкі і некалькі песень з культавага «Народнага альбому». Яшчэ адзін сюрпрыз — песьня з незрэалізаванага пакуль новага праекту Міхала Анемпадыстава «Марскі альбом».

«Будзе цалкам зборная салянка, будуць і песьні з праектаў, якія ня спраўдзіліся. Напрыклад, Міхал Анемпадыстаў хацеў „Марскі альбом“ рабіць, мы адразу напісалі песьню „13“, і яна прапала. Мы выконвалі яе толькі пару разоў на маленькіх акустычных канцэртах».

Па настроі чакаецца «нязмушаная хатняя атмасфэра», а таксама можна ўжо складаць пытаньні да музыкаў — Лявон паабяцаў адказваць.