Стартаваў адбор на міжнародны музычны фэст «The Global Battle Of The Band»

Беларусь удзельнічае ў фэсьце ўжо трэці год. У 2006-м годзе ад Беларусі ў Лёндан езьдзілі Svet Boogie Band, а ў 2007 гледачы абралі беларускім прадстаўніком на «The Global Battle Of The Band» гурт «Гурзуф». Арганізатары запрашаюць музычныя гурты да ўдзелу ў беларускім адбор­ы на GBOB 2008.

«Генеральны прадусарскі цэнтар» праводзіць набор музычных гуртоў для ўдзелу ў беларускім адборачным туры ў межах міжнароднага музычнага фэстывалю «The Global Battle Of The Band» (GBOB). Месца правядзеньня асноўнага туру фэсту — Менск. Пачынаючы з чэрвеня 2008 году ў Менску і ў абласных гарадох пройдуць рэгіянальныя адборачныя туры, па выніках якіх будзе абрана па чатыры лепшых гурта ад кожнай вобласьці і Менску.

Вынікам папярэдняга адбору стане вялікі канцэрт на адкрытай пляцоўцы Менску, на якім прафэсійнае журы з прадстаўленых 28 гуртоў абярэ 12 лепшых, якія й сыдуцца ў фінальнай бітве восеньню 2008 году.

Па структуры праграма ўяўляе з сябе музычны рынг: у кожнай з праграмаў паміж сабою змагаюцца два гурты. Пераможца выходзіць у наступнае кола.

Вырашальнымі ў выбары пераможцы зьяўляюцца галасы гледачоў праз SMS-галасаваньне. Каб дапамагчы вызначыцца гледачам у фінальных праграмах будуць удзельнічаць ужо вядомыя музыкі. Яны будуць як гасьцямі фэстывалю, выконваючы ўласныя творы, так і ў ролі экспэртаў, выказваючы свае думкі пра якасьць выкананьня канкурсантаў.

Фінальнай праграмай стане справаздача здымачнай групы аб правядзеньні фінальных адборачных канцэртаў GBOB у Лёндане з удзелам нацыянальнага пераможцы Беларусі.

Да ўдзелу ў адборачных турах запрашаюцца гурты, якія граюць «жывую» арыгінальную музыку розных стыляў і кірункаў. А пераможца прадставіць Беларусь на міжнародным фэстывалі ў Лёндане ў сьнежні 2008 году.

Гурты, якія зацікаўленыя прыняць удзел у адборачных турах, могуць зьвяртацца па нумарох: (029)187-99-74, (029)7553212. Дэд-лайн на прыём заявак будзе вядомы крыху пазьней, але лепей не зацягваць і зьвяртацца ўжо зараз.