Скандальны фатограф «распрануў» Вену: 1840 аголеных людзей на галоўным стадыёне

Учора скандальна вядомы фатограф Спэнсэр Тунік правёў чарговую нудысцкую фотасэсію на венскім стадыёне імя Эрнста Хапэля. Здымкі замоўленыя венскім музэем і прымеркаваныя да фінальнага матчу чэмпіянату Эўропы па футболе, а ў якасьці бясплатных мадэляў выступілі 1840 чалавек.

Фотасэсія прайшла за некалькі гадзінаў 11 траўня. Людзі, якія «ў чым маці нарадзіла» фатаграфаваліся на трыбунах стадыёну, рабілі гэта бескаштоўна і хіба што атрымаюць на памяць фота з аўтографам фотамастака.

Фота AFP.

Цікава, што здымкі арганізаваныя зь ініцыятывы венскага музэя Kunsthalle, і найперш фота будуць прадэманстраваныя менавіта там 23 чэрвеня. Фотасэсія на галоўным стадыёне Эўра-2008 стала часткай культурніцкай праграмы, прысьвечанай чэмпіянату Эўропы па футболе, які пройдзе ў Аўстрыі і Швэйцарыі 7–29 чэрвеня.

Сам Тунік спэц па «распрананьні» людзей перад аб’ектывам сваёй камэры. Год таму ў Мэхіка ён зладзіў фотасэсію з удзелам 18 тысяч аголеных людзей! За такі скандальны падыход да фотамастацтва Туніка некалькі разоў затрымлівалі ў Нью-Ёрку, але Вярхоўны суд пацьвердзіў ягонае права на свабоду слова. Фотасэія на венскім стадыёне, замоўленая Kunsthalle, зьяўляецца добрым аргумантам на карысьць Туніка і дакладна прыцягне ўвагу да футбольнага чэмпіянату.