Мір. Май. IQ48: «здаровыя лосі» пішуць новы альбом

Сьвята ўсіх працоўных мы правялі ў шэрым, здавалася, ціхім і загадкавым будынку побач з паркавымі алеямі. Але ўнутры жыцьцё віравала, а ва ўтульнай студыі тэмпэратура і пазытыўны, а ў нечым нават дзёрзкі настрой зашкальваў. Гэта «здаровыя лосі» пішуць новы альбом.

З IQ48 і праца ў радасьць — нажартаваліся, наслухаліся кур’ёзных гісторыяў. Альбом між тым паступова запісваўся.

«Ужо пераваліла за палову альбома. Пакуль усе задаволеныя, атмасфэра добрая:) Калі ўсё пойдзе так і надалей, то атрымаем той альбом, пра які марылі апошнія гады», — распавядае пра хаду запіса Яўген Бузоўскі. — Альбом будзе розьніцца ад папярэдніх нашых запісаў гукам, і песьнямі, безумоўна. Лепей мы сталі граць на інструмэнтах, сталі больш сталыя, дарослыя. Гады ідуць і на нас таксама ўплываюць — ня ў тым сэнсе, што мы сталі нейкімі старпёрамі, а ў тым сэнсе, што і з музыкай адбываюцца пазытыўныя зрухі і разьвіцьцё».

Зацаніць другі альбом «здаровых лосяў» па плянах можна будзе ў верасьні-кастрычніку. Назоў iq-шнікі пакуль не рассакрэчваюць — кажуць, што ёсьць некалькі варыянтаў, але чакаюць на «прыход» лепшага: 

«Запішам, паслухаем і можа яшчэ нешта па галаве дасьць добра — і ў самую кропку», — разважае Яўген.

Увесь фотарэпартаж зь месца «баявых» падзеяў глядзіце ў фотаблогу:

IQ48 запісвае новы альбом

Аўтар фота Юра Сідун