Міхалок ня хоча выдаваць свае паэмы

Сяргей Міхалок больш не хавае, што ён і ёсьць Юзік Кілевіч — аўтар злабадзённых вершаў і тэкстаў. Ужо пачалі хадзіць чуткі, што словы «Капіталу» напісаў не Міхалок — прыйшлося «разьвіртуальвацца». Аднак друкаваць напісаныя вершы, апавяданьні і пяць паэмаў Сяргей адмаўляецца.

Арыгінальныя паэтычныя ролікі гурту «Ляпіс Трубяцкі», прысьвечаныя хуткаму сольнаму канцэрту 9 траўня ў Палацы Спорту, нарабілі шмат гулу. Як сталася, іх вершаваны тэкст узяты з паэмаў, якія напісаў Сяргей Міхалок.

Паэзіяй (ня блытаць з тэкстамі песень) лідэр «Ляпісаў» захапляўся даўна, але на публіку пачаў выносіць сваю вершаваную творчасьць толькі колькі год таму пад назовам пад псэўданімам Юзіка Кілевіча.

«Гэта такі мітычны герой беларускага андэрграўнда, які існуе дзесьці між Налібоцкай пушчаю, сутарэньнямі Менску і вар’ятняй», — кажа Міхалок. — «Я называю ягоную творчасьць „гнеўнай псэўдапатэтыкай“. Паэтычна яно натхнёнае Артурам Рэмбо і Ўладзімірам Маякоўскім, а культурна — навеянае мітамі Старажытнай Грэцыі і Скандынавіі». 

Сяргей Міхалок часта чытае вершы Юзіка Кілевіча між песьнямі на канцэртах «Ляпіса Трубяцкога», а таксама шмат распавядае пра яго. Міталягізацыя давяла сытуацыю да таго, што па Сеціве папоўзлі чуткі, што творы Юзіка піша нейкі супэрталенавіты хлопец і ён жа (а не Міхалок!) — аўтар тэксту да песьні «Капітал».

Між тым пад псэўданімам Юзіка Кілевіча ўжо напісана нямала матэрыялу — вершы, апавяданьні і нават пяць паэм. Некаторыя творы былі апублікаваныя ў расейскім часопісе «Крокодил», а вядомае маскоўскае выдавецтва «Амфора» прапанавала аўтару выдаць кнігу, але Міхалок адмовіўся:

«Я лічу, што для народнай папулярнасьці сапраўднаму слову не абавязкова ісьці ў друк!»

А вось на канцэрце сыпаць сваімі паэтычнымі пярлінамі Міхалок будзе шчодра. 

паводле прэс-рэлізу