21 студзеня — Дзень абдыманкаў
21 студзеня адно з самых прыемных сьвятаў — Дзень абдыманкаў. Сёньня можна ўсё — нават абняць незнаёмага чалавека :) Хаця такі цудоўны сэнс сёньняшні дзень набыў зусім нядаўна — у 1986, знайсьці таго, каму першаму тая ідэя прыйшла ў галаву, цяжка. Вядома, што нарадзілася яна ў студэнцкім асяродку заходнеэўрапейскай моладзі.
Менавіта 21 студзеня хлопцы і дзяўчаты абдымалі адзін аднаго — але без усялякага інтымнага падтэксту:) Бо вядома ж, што падчас сяброўскіх абдыманкаў мы дзелімся адзін з адным нашаю цеплынёю.
Калі вы ўжо пераабдымалі усіх навокал, можна даслаць віртуальную абдыманку ўсяму сьвету, спраўдзіўшы, што «мір пачынаецца зь мяне».
А лепш далучыцца да ініцыятывы Хуана Мана «Free Hugs». Сёньня ў многіх краінах сьвету можна было пабачыць людзей з таблічкамі «Free Hugs» — любы жадаючы мог падысьці і абняцца.
А пачыналася ўсё так: слаўнае жыцьцё Хуана Мана ў Лёндане раптоўна развалілася — яму прыйшлося ляцець дахаты, у Сідней. Ён глядзеў, як людзі сустракаюць у аэрапорце сваіх блізкіх і сяброў, як яны радуюцца адзін аднаму. І падумаў Хуан, што больш за ўсё ён жадае зараз, каб і яго так чакалі. Каб проста абнялі.
Тады ён напісаў на кардонцы «Абдыманкі проста так» — і гуляў па вуліцах. Па ягоных словах, першай, хто да яго падыйшоў, была жанчына, якая распавяла, што сёньня зранку памёр ейны любімы сабака. І што тым самым ранкам была гадавіна гібелі ў аварыі ёйнай адзінай дачкі. І зараз, калі яна пачувае сябе зусім адзінокай, ёй патрэбны абдыманак. Яны абняліся — і ім стала лягчэй.
Потым на YouTube зьявілася відэа пра Хуана Мана і ягоную ідэю падхапілі тысячы людзей.
Жадаеце далучыцца? Тады сёньня — якраз падыходзячы дзень.
Ад апантаных аматараў абдыманак Generation.by усім віншаваньні!