Мільянэрам у Вялікабрытаніі ня трэба будзе здаваць тэст па ангельскай мове

У Вялікабрытаніі зьбіраюцца вызваліць мільянэраў ад абавязковага тэста па ангельскай мове. У той жа час, прэмьер-міністар краіны плянуе зрабіць ангельскую моваю сьвету.

«Вучы ангельскую, яна табе спатрэбіцца», — кажуць дзецям у школе. Зараз можна адказаць: «не абавязкова». Ва ўсялякім выпадку, тым, хто зьбіраецца пасяліцца ў Вялікабрытаніі. Дастаткова проста быць мільянэрам. Мільён фунтаў стэрлінгаў на рахунках брытанскіх банкаў вызваляе ад абавязковага тэсту па ангельскай мове.

Такая ініцыятыва ўраду выклікала неадназначную рэакцыю.

Прыхільнікі ідэі сьцьвярджаюць, што людзі, кшталту Рамана Абрамовіча, прыносяць вялікую карысьць дзяржаве інвэстыцыямі ў эканоміку і стварэньнем новых працоўных месцаў. Таму і ня трэба патрабаваць зь іх веданьня мовы — атрыманьне жыхарства і грамадзянства для мільянэраў мусіць быць спрошчаным.

Тыя ж, хто супраць такой ініцыяты­вы, настойваюць, што да «тлустых катОў» патрабаваньні мусяць быць тыя ж, што і да астатніх жадаючых пасяліцца ў Вялікабрытаніі.

У той жа час, Гордан Браўн прапанаваў больш актыўна папулярызаваць вывучэньне ангельскай мовы ў неангламоўных краінах, асабліва ў Індыі і Кітаі. Так, па падліках, да 2025 колькасьць людзей, якія размаўляюць па-ангельску, перабольшыць колькасьць англамоўных ва ўсіх астатніх краінах.

«Веліч краіны вызначаецца не тэрыторыяй, а мовай, што можа зрабіць бліжэй людзей з 200 краінаў сьвету», — лічыць Гордан Браўн.