Эўразьвяз будзе прыцягваць таленавітых спэцыялістаў «блакітнымі карткамі»

Эўразьвяз адчыняе свой рынак для высокакваліфікаванай працоўнай сілы зь іншых краінаў. Для рэалізацыі гэтага рашэньня плянуецца ўвесьці адмысловыя «блакітныя карткі» («blue card»), якія дадуць магчымасьць іх уладальніку працаваць на ўсёй тэрыторыі ЭЗ.

Камісар Эўракамісіі па пытаньнях юстыцыі, волі і бясьпекі Франка Фрацьціні (Franco Frattini) у інтэрвію euobserver.com распавёў, што картка атрымала такую назву ад колеру сьцяга Эўрапейскага Зьвяза.

Эўрапейскі чыноўнік спадзяецца, што атрымаецца зрабіць Эўропу больш прыцягальнай для іміграцыі кваліфікаваных спэцыялістаў, чым ЗША, Канада альбо Аўстралія. Для гэтага ўжо ў верасьні адпаведнае заканадаўства будзе прадстаўлена Эўракамісіяй на зацьвярджэньне міністраў унутраных спраў ЭЗ.

Назва «blue card» адразу выклікае аналёгіі з амэрыканскай «green card», аднак у іх ёсьць істотнае адрозьненьне.

«Блакітная картка» – не пастаянная картка як амэрыканская «зялёная картка», -- адзначыў Франка Фрацьціні.

Уладальнік «блакітнай карты» зможа па завяршэньні фіксаванага кантракту ў адной з краін ЭЗ, пераязджаць у іншую ў выпадку ўзьнікненьня там вакансіі. Аднак новы дакумэнт не дае правы на сталае жыхарства ў Эўразьвязе і на неабмежаваны па часе працоўны кантракт.

«Блакітная картка» будзе сапраўдная на працягу пяці гадоў пасьля вяртаньня яе ўладальніка з ЭЗ на радзіму. У любы момант ён можа вярнуцца ў ЕЗ, калі там зьявіцца адпаведная вакансія.