Ельскі ўнівэрсытэт выкладзе відэазапісы лекцыяў у інтэрнэт

Сродкі на яго рэалізацыю выдзяліў фонд William and Flora Hewlett Foundation.

Ельскі ўнівэрсытэт зьяўляецца адным з самых дарагіх ВНУ у ЗША. За навучаньне ў Елі студэнты плацяць каля 46 000 даляраў у год. Новы праект дазволіць зрабіць лекцыйныя матэрыялы даступнымі для тых, хто ня мае фінансавых магчымасьцяў навучацца ва ўнівэрсытэце.

Заўзятары інтэрнэту здолеюць праглядаць відэазапісы, канспэкты і сьценаграмы сямі курсаў, сярод якіх “Асновы фізыкі”, “Уводзіны ў палітычную філязофію” і іншыя, якія пачнуцца ў 2007 навучальным годзе. Аднак выкладчыкі ўнівэрсытэта адзначаюць, што гэтыя курсы не залічваюцца як навучаньне ў Елі і ня могуць замяніць фактычнага навучаньня.

Многія іншыя амэрыканскія ўнівэрсытэты таксама выкладаюць у інтэрнэт матэрыялы курсавых праграмаў, доступ да якіх бясплатны, але пакуль яны абмяжоўваюцца толькі канспэктамі.

У Беларусі ўнівэрсытэты ня маюць традыцыі выкладаць на сваіх афіцыйных сайтах лекцыі для агульнага доступу. Але ёсьць асобныя выкладчыкі, якія самі практыкуюць сыстэму раздачы лекцыйных матэрыялаў у электронным выглядзе для студэнтаў, якім выкладаюць. Таксама ёсьць факультэты, дзе некаторыя матэрыялы даступныя праз інтэрнэт, але толькі пры ўмове навучаньня на адпаведным факультэце і адпаведнай рэгістрацыі на сайце ўнівэрсытэту.

Як адначаюць некаторыя беларускія выкладчыкі, ёсьць пэўнае хваляваньне, ці будуць студэнты наведваць заняткі, калі й так будуць мець матэрыялы лекцыяў. Але студэнты настойваюць: “Задача выкладчыка ня проста даць сухія тэарэтычныя веды, а патлумачыць і зацікавіць.” Зрэшты выкладчыкаў можна супакоіць – наведваньне лекцыйных заняткаў у Беларусі абавязковае.