Дзяўчаты сышліся ў паэтычным слэме

Адметнасьці надавала яшчэ й тое, што падзея была міжнароднай. Сам па сабе жаночы слэм зьява ўжо цікавая, а тым болей міжнародны – такая падзея ў нас упершыню. З болей чым дзесяткам беларускіх дзяўчат у паэтычнай барацьбе змагаліся ўкраінка, фінка і швэдка. І выніковая перамога таксама атрымалася міжнароднай. Першае месца падзялілі артыстычная Вера Бурлак і абаяльная фінска-швэдзкая паэтка Солья Крапу з перакладчыцай Алесяй Башарымавай, а бронзу атрымала «навічок у слэмах» дасьціпная Юля Цімафеева.

Кожная з удзельніц мела па тры хвіліны, каб уразіць слухачоў словам ды артыстызмам, частка зь якіх і журыла паэтак. Зрэшты, прыязная атмасфэра натхняла «пажурыць» жартам ды вясёлымі камэнтарамі ня толькі сябраў журы. Найперш не саромеўся камэнтаваць Сяргей Вераціла, які ў перапынку і сам выскачыў на сцэну, а па завяршэньні слэму стаў героем сьвежасьпечанага вершу Марыі Мартысевіч. Эмоцыі вечару — у нашым фотарэпартажы.