Кітай зьбіраецца ўвесьці абмежаваньне на колькасьць студэнтаў ВНУ

Урад Кітая зьбіраецца ўвесьці адмысловае абмежаваньне на колькасьць студэнтаў у вышэйшых навучальных ўстановах.

Як паведамляе газэта "Чайна дэйлі", адпаведнае рашэньне было прынятае на пасяджэньні Дзяржсавета КНР.На пасяджэньні адзначалася, што ў цяперашні час у ВНУ Кітая навучаецца 23 мільёна студэнтаў - больш, чым дзе ў сьвеце. У 2005 годзе ў інстытуты і ўнівэрсытэты КНР было прынята 5,04 мільёна студэнтаў, што ў 4,7 разоў больш, чым у 1998 годзе.

Улады кітая занепакоеныя тым, што павелічэньне колькасьці студэнтаў суправаджаецца неадэкватным павелічэньнем фінансаваньня, а пагаршэньнем умоваў адукацыі. У ВНУ прымяняецца састарэлая мэтодыка выкладаньня.

Аднак, самай сур'ёзнай пагрозай павелічэньня колькасьці студэнтаў і, адпаведна, асобаў з вышэйшай адукацыяй на рынку працы ў апошнія гады сталася беспрацоўе.

Згодна дадзеным Дзяржкамітэта КНР па развіцьцю і рэформам, у гэтым годзе каля 60% выпускнікоў ВНУ не змогуць знайсьці адэкватную сваёй адукацыі працу.

У 2006 годзе ВНУ Кітая скончаць 4,1 мільёна студэнтаў, што на 22% больш, чым у мінулым годзе. Аднак працу сабе знайсьці змогуць толькі 1,7 мільёнаў студэнтаў.