Музыкі са зборніка песень пра адмену візаў: «У Еўропу не ездзілі ні я, ні ён»

Наколькі блізкія былі брэменскія музыкі, настолькі далёкі Брэмен ад нас, нават ад тых, хто хоць раз пад’язджаў да мяжы без візы. Музыканты, трэкі якіх увайшлі ў антывізавы музычны зборнік кампаніі «Без візы», расказваюць, чым іх зачапілі межы.

«Яны пазбаўляюць мяне мары»

«Праблема віз і межаў у тым, што яны пазбаўляюць мяне мары, – кажа Аляксей Зубр, вакаліст і кампазітар Bulba Fusion. – Яшчэ з дзяцінства я мроіў, як аднойчы мы з даўгім басістам скрадзем прынцэсу, возьмем з сабой сабаку, ката і пеўня і паедзем ірваць гарады і вёскі нашай вясёлай музыкай.

Прынцэсу скралі, звяроў знайшлі, я нават на радасцях упрогся везці гэты бязглузды балаган. Але візы і межы страшэнна ўсё ўскладняюць. Я за свабоду перасоўвання!»

«Задумваешся, ці пусцяць цябе»

Не вельмі вядомы алдовы гурт «РГ.Диверсия» добра так пакатаўся аўтаспынам, песня пра адну з такіх вандровак увайшла ў зборнік. Але віз ніколі ў іх не было. Гэта не перашкодзіла аб’ездзіць сваю краіну, суседнюю Украіну і Расею, у якой 8 тысяч кіламетраў без віз.

«Песню я пісаў на трасе, у кабіне фрэдлайнера, недзе між Чытой і Хабараўскам, – распавядае Алег Кісялеўскі. – І я, і Дзяніс (другі ўдзельнік гурта) большую частку свайго жыцця ездзілі па краіне аўтаспынам, па Украіне, Расіі. У Еўропу не ездзілі ні я, ні ён».

Калі б не было віз, мажліва, музыкі даехалі б і да акіяну – у вандроўцы, калі жывеш сваім «тут і цяпер» жаданне перасекчы мяжу ўзнікае спантанна. І хто хоча чакаць паў гады, калі мяжа ў некалькіх кіламетрах?

Візы па пяць, але маленькія

«Я застаў той час, калі віза ў Літву ці Польшчу каштавала 5 еўра, і нават для студэнта-першакурсніка не была перашкодай для вандроўкі. Я гэтым актыўна карыстаўся, – расказвае Яўген Сокалаў, вакаліст і гітарыст заваднога гурта ZnaROCK. – Хочацца пажадаць, каб праца кампаніі [“Без візы!”] мела плён і цяперашнія студэнты таксама без праблем вандравалі ў заходнім накірунку.

Песню мы напісалі з сябрам Янам Вераб'ём менавіта ў студэнцкія гады. Амстэрдам быў увасабленнем класічнага сімвала "Sex, drugs & rock'n'roll". Адначасова ён быў дастаткова далёкім і недасяжным, каб вандроўка туды магла стаць марай. Гады мінулі, мара спраўдзілася і не расчаравала».

Невялікі зборнік з вандроўнымі песнямі ад сёння можна спампаваць на старонцы кампаніі «У Беларусь і Еўропу - БЕЗ ВІЗЫ!». Дыск можна будзе атрымаць на адкрытай прэзентацыі паспяховых бязвізавых праектаў, якую абяцаюць зладзіць укладальнікі.

Удзельнікі кампаніі спадзяюцца, што калі-небудзь візавы рэжым будзе спрошчаны ці адменены, бо супраць нелегальнай міграцыі і злачыннасці, на іх думку, ён не дапамагае, але надта замінае пабачыць свет.