Знік малады журналіст і музыка Зміцер Шаўчук

Сябры Змітра звярнулі ўвагу на тое, што хлопец не выходзіць на сувязь, яшчэ некалькі дзён таму. Але, калі са знікнення прайшло ўжо болей за тыдзень, пачалі біць у званы. 

Паведамленне Яна Бусла пра знікненне Змітра Шаўчука набрало ўжо болей за чатыры сотні рэшараў, але не знайшло нікога, хто б бачыў хлопца ў апошнія дні.

Вядома, што ноч з 20-га на 21 жніўня Зміцер правёў у знаёмай. Апошні раз выходзіў з ёй на сувязь 22-га а 10-й раніцы праз скайп. Пазней з ім ніхто не кантактаваў. 

Сяброў насцярожыла тое, што рэчы Змітра Шаўчука, у тым ліку зарадка ад тэлефона і лэптоп, застаюцца дома, і Зміцер не ўзяў іх з сабой. 

Хлопец быў апрануты ў сінія джынсы, карычневую майку, карычневы тонкі швэдар, на галаве была павязка-хустка. З сабой ён меў наплечную сумку светла-бэжавага колеру. Дрэды Зміцер нядаўна абрэзаў.

Зміцер Шаўчук нарадзіўся ў Жытоміры ва Украіне. Вырас у Менску, куды пераехаў з бацькамі. Вучыўся на гістфаку БДУ. Працаваў на розных радыёстанцыях і граў у музычных гуртах. Гэтым летам займаўся арганізацыяй фэстаў і канцэртаў, працуючы на агенства «Шаблі».

Сябры і мноства знаёмых Змітра абшукалі ўжо фактычна ўсе магчымая месцы, дзе ён бывае, і працягваюць пошукі.

Усіх, хто бачыў Змітра альбо валодае іншай інфармацыяй, якая можа дапамагчы ў яго пошуках, просяць пісаць у адмысловую групу на Facebook.