У Баранавічах туркменскія студэнты пабіліся з мясцовымі

Скрыншот з відэа, якое выклаў адзін з відавочцаў

Па словах відавочцаў, якія апісваюць падзеі ў сацыяльных сетках, цягам тыдня ў Баранавічах нарасталі сутычкі паміж мясцовымі і студэнтамі з Туркменістана. У пятніцу асабліва моцна пацярпеў адзін з баранавіцкіх хлопцаў. На відэа, якое змешчана ў vkontakte з кадрамі пасля бойкі, чалавек ляжыць на зямлі, а вакол яго мітусяцца міліцыянты і медыкі.

Відавочцы сцвярджаюць, што канфлікт распаліўся нібыта з-за таго, што замежныя студэнты чапляліся да дзяўчыны, а мясцовы навучэнец ПТВ спрабаваў ім перашкодзіць. І яго пабілі. Далей прыбеглі сябры хлопца і пабілі ўжо ўсіх, хто меў знешнасць падобную да туркменаў. У пятніцу бойка паўтарылася, але міліцыя яе разагнала. Многія разбегліся, але частка удзельнікаў з абодвух бакоў пахавалася непадалёк. У выніку новага сутыкнення адзін з хлопцаў быў збіты асабліва моцна.

У сацыяльных сетках з’явіліся заклікі сабрацца ў суботу каля цэнтральнай плошчы, каб «предпринять меры».

Тым часам з’яўляюцца таксама супрацьлеглыя звесткі пра віноўнікаў пачатку канфлікту. Паводле гэтых меркаванняў сутыкненні пачаліся з-за таго, што беларусы збілі туркменскую дзяўчыну з хлопцам. 

Вечарам суботы аўтазакі з міліцыяй ўзмоцнена патрулявалі Баранавічы ды спынялі групы моладзі, якія ўтвараліся ў цэнтры горада. Мясцовае выданне intex-press.by назірала за працэсам. Паводле іх звестак, частка моладзі была затрыманая. У ГУУС моладзь фатаграфавалі, а некаторых вызвалілі праз дзве гадзіны.

«Пераканаўчая просьба да ўсіх замежных студэнтаў, якія навучаюцца ў БарДУ — захоўваць спакой і выконваць заканадаўства Рэспублікі Беларусь», — Баранавіцкі ўніверсітэт адрэагаваў на падзеі заявай, якую змясціў у vkontakte начальнік аддзела выхаваўчай працы з моладдзю БарДУ Павел Папко.

UPD 16.12.2013: Баранавіцкі РАУС заявіў, што паводле іх інфармацыі, прычынай канфлікту стала рэўнасць хлопца, дзяўчына якога перапісвалася з туркменам праз сацыяльныя сеткі. 13 снежня каля 20.00 адбылася бойка, у выніку якой пацярпеў 15-гадовы хлопец. З дыягназам «закрыты пералом левага перадплечча» ён быў дастаўлены ў лякарню. На месцы падзеяў міліцыяй быў затрыманы малады грамадзянін Туркменістана, які аднак па словах міліцыі, не мае дачынення да бойкі. Ён быў асуджаны судом за дробнае хуліганства на 260 тыс. штрафу.