Еўрапейскі гуманітарны каледж

Еўрапейская камісія ў два разы скарачае фінансаванне ЕГУ і прапануе ўніверсітэту на выбар некалькі вопцый: стаць каледжам, вучыць толькі праз Інтэрнэт, ператварыцца ў частку літоўскай ВНУ альбо перайсці цалкам на расейскую мову.

Студэнты ЭГУ у час візыту ў Страсбург

Такія прапановы адміністрацыі ЕГУ зрабіў брытанскі даследчык Стэфан Уэбер, што па замове Еўрапейскай камісіі займаўся маніторынгам сітуацыі ва ўніверсітэце. Укладанне грошай у праекты, звязаныя з Беларуссю, рэзка знізілася, прыярытэты цяпер ляжаць у іншых рэгіёнах, заявіў рэктар ЕГУ Анатоль Міхайлаў на паседжанні сенату ўніверсітэту.

ЕС прапануе далучыць ЕГУ да аднаго з літоўскіх ўніверсітэтаў альбо перайсці на дыстанцыйнае навучанне, паведамляе Радыё Свабода. Разглядаецца таксама варыянт скарачэння колькасці студэнтаў і навучальных праграмаў — тады ЕГУ будзе працаваць як каледж.

Іншы варыянт: развіццё расейскамоўнага навучання, каб прыцягнуць студэнтаў з Расіі.

«Адукацыя на рускай мове ў рэгіёне — такі праект магчымы, аднак гэта выкліча негатыўную рэакцыю ў беларускамоўнай публікі ў Беларусі і ў ЗША», — заявіў на такую прапанову рэктар.

Але ўжо цяпер у ЕГУ вучацца літоўскія і расейскія студэнты. Кошт навучання для грамадзян нашай краіны вагаецца ад 600 да 2,5 тысяч еўра на год. Між тым, ВНУ не акупляе сябе і без фінансавай падтрымкі паўнавартасна існаваць не зможа.

Еўрапейская камісія, асноўны фундатар ЕГУ, з наступнага году магчыма будзе даваць ЕГУ не 1 млн. еўра як раней, а паўмільёны. Аднак гэта не адзіная крыніца фінансавання ўніверсітэту.

Цяпер да 70% сродкаў ўніверсітэт у выгнанні атрымлівае ад спонсараў, якія пераважна месцяцца ў краінах Паўночнай Еўропы і Амерыцы. У 2012 годзе сума ахвяраванняў заходніх краін і фундацый у ягоныя фонды аказалася параўнальнай з бюджэтам Акадэміі кіравання пры прэзідэнце і на 15% меншай за бюджэт БРСМ. Акрамя Еўракамісіі грошы на ўтрыманне ЕГУ у мінулым годзе вылучылі Нарвегія (па $900 тыс. цягам трох гадоў), ЗША ($1 млн. на тры гады), фундацыя Макартураў ($500 тыс.).

UPD Еўрапейская камісія пацвердзіла вылучэнне аднаго мільёну еўра на падтрымку ЕГУ ў 2013 годзе. Лёс еўрапейскай дапамогі ЕГУ ў 2014-2020 гадах пакуль незразумелы. Generation.by будзе сачыць за лёсам самага буйнога беларускага незалежнага ад уладаў адукацыйнага праекту.