Вілейскія рэпэры прэзэнтуюць альбом у гонар роднага гораду

23 лютага ў клюбе Re:public прадстаўнікі новай хвалі беларускага хіп-хопу PANaNieba прадстаўляюць свой другі альбом 71. Папярэдні альбом каманды «Людзі на балоце» стаў лепшым дэбютным альбомам беларускай музыкі, а адзін з ягоных трэкаў «Усё будзе добра» — хітом мінулага году.

Нумар у назьве альбому 71 – гэта дзьве апошнія лічбы тэлефоннага коду горада Вілейка, адкуль паходзяць заснавальнікі гурта.

«У Вілейцы я вырас, там зараз жывуць мае бацькі, да якіх я, на жаль, усё радзей прыяжджаю, і гэта вельмі сумна. Тут у Менску такая мітусьня, часта прыходзіцца зьмяняць здымныя кватэры, я нават не памятаю адрэсу, дзе зараз жыву, а вось кватэру і нумар роднага дому ніколі не забуду, – кажа SP Kava. – Для нас 71 – гэта ня проста лічбы з тэлефоннага коду, гэта сымбаль. Калі мы працавалі над песьнямі, я знаходзіўся ў Менску, S’viedak — у Маскве, а ў правінцыі ўсё па-іншаму. Мне здаецца, час там запавольваецца, і 7 доўгіх дзён падаюцца як 1 вялікі. Галоўная думка нашага альбому, што варта кожны з 7 дзён на тыдні пражываць, як 1 апошні».

Кружэлка была выдадзены лэйблам БМА-груп сумесна з кампаніяй «Вігма» за два дні да Новага году, стаўшы апошнім рэлізам 2011-га году ў беларускай музыцы.

Акрамя ўласна заснавальнікаў PANaNieba, удзел у запісе альбому ўзялі рэпэр Zeman і музыка Тарас з гурта «Планета всех», у трэку «Буйкі» ў якасьці запрошанай вакалісткі выступіла маладая і таленавітая сьпявачка Natalika. Адзін з трэкаў «Трываю» быў запісаны пры ўдзеле лідэра Neuro Dubel Аляксандра Кульлінковіча.

Праект PANaNieba пачаўся з двух рэпераў S’viedak’а і SP Kava, якія пачалі працаваць разам у 2006 годзе. Усур’ёз пра сябе яны заявілі, выдаўшы першы студыйны альбом «На балоце», які атрымаў перамогу ў намінацыі «Лепшы дэбютны альбом» на ўзнагародах Experty.by. А песьня з гэтага дыску «Ўсё будзе добра» увайшла ў лік галоўных хітоў сэзону 2010-2011 на інтэрнэт-партале Tuzin.FM.

Канцэртная прэзэнтацыя пройдзе 23 лютага ў Re:public. Квіткі ад 30 да 55 тыс. Пачатак у 19.00.