Літоўскія СМІ: «Сын высокапастаўленага беларускага чыноўніка вучыцца, п’янствуе і дэбашырыць у Вільні»

На старонкі літоўскіх СМІ трапіла гісторыя пра беларускага студэнта, бацька якога валодае вялікімі грашыма і займае высокую пасаду ў адміністрацыі прэзыдэнта Беларусі. Паведамляецца, што за інфармацыю пра крыўдзіцеля сына беларускі чыноўнік абяцаў €200 000, пры гэтым аплочваючы студэнту жыльлё ў адным з самых дарагіх кварталаў Вільні. Гісторыя трапіла на старонкі СМІ праз тое, што «крыўдзіцель» апынуўся інфарматарам па гучнай судовай справе.

Як піша delfi.lt са спасылкай на тэлеканал BTV, студэнт аднаго зь віленскіх ВНУ Вячаслаў трапіў у цэнтар скандалу аб раскрыцьці імя важнага інфарматара літоўскай паліцыі па справе нашумелага забойства судзьдзі, што здарылася некалькі гадоў таму.

Па зьвестках журналістаў, сын вельмі заможнага бацькі з адміністрацыі прэзыдэнта Беларусі, а таксама вядомы заўсёднік расейскіх начных клюбаў Вільні, 6-га лістапада быў выведзены з клюбу Olialia за непрыстойныя паводзіны. Па словах ахоўнікаў, ён быў п’яны і прыставаў да дзяўчын. Калі Вячаслава вывелі з клюбу, п’яны юнак працягваў дэбашырыць, лаяцца. І атрымаў у твар. А потым, падаючы, разьбіў галаву і трапіў у лякарню.

Сьцьвярджалася, што бацька беларускага студэнта прапанаваў прэмію ў памеры €200 000 таму, хто дапаможа знайсьці крыўдзіцеля сына.

Літоўскія СМІ зьвяртаюць увагу на тое, што студэнт Вячаслаў жыў VIP-комлексе Vilniaus vartai, дзе кошты на кватэры пачынаюцца ад €150 тысячаў.

Як паведамляецца, цяпер аднаму з ахоўнікаў клюбу, Міндаўгасу Жалімасу, пагражае 10 гадоў турмы за пабітага сына беларускага чыноўніка.

Але ахоўнік апынуўся няпростым хлопцам. 

За інфармацыю пра гэтага чалавека беларускі чыноўнік абяцаў €200 000. Фота BTV

Ахоўнік Жалімас быў інфарматарам па адным з эпізодаў судовай справы аб забойствах, дзе пад падазрэньне трапілі высокапастаўленыя супрацоўнікі паліцыі. Цяпер у сувязі са зьбіцьцём беларускага студэнта яго імя раскрытае, а сам ён шукае дапамогі ў Генпракуратуры Літвы, бо лічыць, што паліцыя помсьціць яму.

Тым часам, дзякуючы гэтай гісторыі, беларусы даведаліся пра чарговае дзіця беларускага чыноўніка, якое вучыцца за мяжой.