Сёньня ў кнігарні «логвінаЎ» стартуе месяц нямецкай літаратуры

Цэлы месяц у цэнтры Менску ў кнігарні «логвінаЎ» будзе стаяць вялікая паліца зь нямецкімі, аўстрыйскімі і швэйцарскімі кніжкамі. Набыткі нямецкай і нямецкамоўнай літаратуры: сучасныя і клясычныя, перакладзеныя і ў арыгінале — падыходзь і набывай, ці проста чытай. Акрамя гэтага ў кнігарні можна будзе азнаёміцца зь нямецкімі газэтамі і мастацкімі альбомамі нямецкіх ілюстратараў.

Увесь верасень раз на тыдзень у кнігарні «логвінаЎ» можна будзе ўбачыць і паразмаўляць з літаратурнымі зоркамі першай велічыні.

5 верасьня (панядзелак)

Пасьля ўрачыстага адкрыцьця, дзе выступяць ганаровыя госьці, адбудзецца творчы вечар яскравага прадстаўніка беларускага мадэрнізму Алеся Разанава з прэзэнтацыяй яго нямецкамоўнай кнігі Der Mond denkt, die Sonne sinnt («Месяц думае, Сонца разважае»). Вядучы імпрэзы — Ігар Бабкоў. Пачатак а 19-й гадзіне.

10 верасьня (субота)

Дзіцячы ранішнік «Guten Tag, Tanaka! Падарожжа Капітана Танакі ў незвычайную краіну Германію» з прызамі і гарбатай. Вядучы — плястылінавых спраў майстра Алесь Кудрыцкі. Пачатак а 14-й гадзіне.

12 верасьня (панядзелак)

Вечар сучаснай нямецкай літаратуры. Падвядзеньне вынікаў конкурсу Інстытута імя Гётэ і часопіса «Прайдзісвет» на пераклад навэлы Гайнрыха фон Кляйста. Знаёмства маладых беларускіх перакладчыкаў з сучаснай нямецкай літаратурай. Вядучая — Вера Дзядок.

17 верасьня (субота)

Нон-стоп паказ 3 стужак рэжысёра Фатыха Акіна на нямецкай мове. Пачатак а 14-й гадзіне. Уваход — вольны.

19 верасьня (панядзелак)

Творчая вечарына легенды беларускай літаратуры, перакладчыка Васіля Сёмухі. Падчас вечарыны адбудзецца прэзэнтацыя перакладной вэрсіі кнігі Германа Гесэ «Стэпавы воўк» і зборніка «Званы старое казкі», куды ўвайшлі беларускія пераклады вершаў нямецкіх кампазытараў. Запрошаныя госьці — Лявон Баршчэўскі, Зьміцер Колас і Андрэй Хадановіч. Пачатак а 19-й гадзіне.

26 верасьня (панядзелак)

Сустрэча са швэйцарскім пісьменьнікам Йенсам Нільзэнам. У імпрэзе возьме ўдзел перакладчыца Ірына Герасімовіч. Вядучы — Андрэй Хадановіч. Пачатак а 20-й гадзіне.

Кнігарня «логвінаЎ» знаходзіцца на пр. Незалежнасьці 37а, у адным будынку з Галерэяй сучаснага мастацтва «Ў» і барам «Малако». Кантактны тэлефон: +375-44-7236574 (Павал).