Унівэрсытэт заплаціў $55 000 за маўчаньне пра забойствы студэнтаў

Вірджынскі палітэхнічны інстытут аштрафаваны на 55 тысяч даляраў па справе аб масавым забойстве, якое адбылося ў гэтай навучальнай установе тры гады таму.

Уся Амэрыка была шакаваная забойствам

Тады ў Вірджынскім палітэхнічным быў усталяваны своеасаблівы сумны рэкорд у самым масавым забойстве ня толькі ў гісторыі амэрыканскіх ВНУ, але наагул у гісторыі ЗША, зьдзейсьненае адным злачынцам пры дапамозе агнястрэльнай зброі, паведамляе AP.

16 красавіка 2007 студэнт гэтага інстытуту, 23-гадовы выхадзец з Паўднёвай Карэі Чо Сын Хі забіў на тэрыторыі навучальнай установы больш за 30 чалавек, і пасьля скончыў жыцьцё самагубствам. Спачатку ён забіў двух чалавек у інтэрнаце, а празь некалькі гадзін адкрыў агонь па студэнтах у адным з навучальных карпусоў.

Аднак адміністрацыя ня стала адразу ж апавяшчаць студэнтаў аб зьдзейсьненых у інтэрнаце забойствах і не аддала распараджэньне аб адмене заняткаў. За гэта яе цяпер і пакаралі максымальным у такіх выпадках штрафам у 55 тысячаў даляраў.

Амэрыканскія ўлады вырашылі, што кіраўніцтва навучальнай установы парушыла фэдэральны закон, не паведаміўшы своечасова студэнтам пра першыя два забойствы. У ЗША ёсьць адмысловы закон, які абавязвае навучальныя ўстановы, што атрымліваюць фінансаваньне зь дзяржбюджэту, паведамляць праваахоўным органам аб злачынствах, якія зьдзяйсьняюцца на іх тэрыторыі.

Студэнт Вірджынскага інстытуту ля кветак у памяць ахвяраў забойства

Камісія па расьсьледаваньні забойства ў інстытуце, створаная ўладамі штату, прыйшла да высновы, што колькасьць ахвяраў магла б быць меншай, калі б адміністрацыя навучальнай установы своечасова апавясьціла студэнтаў пра першыя забойствы. Калі б адміністрацыя паступіла інакш, гаварылася ў дакладзе камісіі, у студэнтаў было б больш часу для таго, каб прыняць меры па забеспячэньні ўласнай бясьпекі.