Міністэрства турызму прапануе адмяняць няроўныя тарыфы ў гатэлях для замежнікаў

Існуючую яшчэ з савецкіх часоў традыцыю мець розныя кошты ў гатэлях для замежнікаў і беларускіх грамадзянаў прапануе адмяніць Міністэрства спорту і турызму. У некаторых беларускіх гатэлях такая практыка адышла ў нябыт, аднак большасьць гатэляў, асабліва ў райцэнтрах, маюць адрозныя кошты для грамадзянаў розных краін.

Двухмясцовы нумар за 38 760 у нясьвіскім гатэлі

Па словах дырэктара дэпартамэнту па турызьме Міністэрства спорту і турызму Беларусі Віктара Янкавенкі, цяпер коштавая палітыка гатэляў цалкам залежыць ад волі ўласьніка.

«Я выступаю катэгарычна супраць таго, каб для беларусаў быў адзін кошт, для расейцаў іншы, а для палякаў трэці», — заявіў БелТА спадар Янкавенка.

Да прыкладу, гатэль «На ростанях» у Старых Дарогах прапануе двухмясцовы аднапакаёвы нумар за 43 900 рублёў. Але тое толькі для грамадзян Беларусі і СНД. Для замежнікаў кошт нумару вырастае да 58 256 рублёў. А вось адзіны гатэль у Нясьвіжы, які ня мае ніводнай зоркі, затое пазначаны «другой катэгорыяй», прапануе двухмясцовы аднапакаёвы нумар за 38 760 беларускіх рублёў. Пры гэтым падвышаючыя каэфіцыенты для замежнікаў адсутнічаюць.

Выправіць сытуацыю, на думку чыноўнікаў Мінспорту, можа ўзмацненьне канкурэнцыі. «Чамусьці гатэль „Менск“ і гасьцініцы ў нацыянальных парках маюць адзіныя тарыфы, а ў некаторых раённых цэнтрах пра гэта нават не задумваліся, — кажа дырэктар дэпартамэнту. — Прычым чым меншы горад і горшы гатэль, тым большая розьніца ў тарыфах для рэзыдэнтаў і замежнікаў».