Эстонская моладзь ратуецца ад крызысу ў войску

На тэрміновую службу ў эстонскае войска трапіць нялёгка: з-за крызысу моладзь з ахвотай ідзе служыць. У выніку чарга на васьмімесячную службу расьцягнулася на паўтары гады, а рэкруцкія службы перавыконваюць плян набору.

Сёлетні прызыў у эстонскае войска, дзе мінімум 8 месяцаў абавязаныя служыць усе юнакі ад 18 да 28 гадоў, парадаваў вайскоўцаў: плян па навабранцах перавыкананы на 119 чалавек — да вайсковай службы прыступілі 1319 прызыўнікоў. І гэта пры тым, што чэргі на тэрміновую службу расьцягнуліся да паўтара гады.

Заклік служыць у войску Латвіі

Эканамічны крызыс падвысіў цікавасьць моладзі да службы ў эстонскай арміі, паведамляе Delfi.ee. Многія добраахвотна запісваюцца ў войска, паколькі знайсьці працу ў крызысных умовах ня так і проста. Напэўна, у тым ліку з-за гэтага колькасьць ухілістаў ад зьменшылася удвая.

Прыкладна такая ж сытуацыя назіраецца і ў суседняй Латвіі. Хаця служба ў войску там і неабавязковая, чарга ля рэкруцкіх пунктаў маецца. Вайскоўцы кажуць, што на сёньня служыць просяцца 592 кандыдаты. «У нас ужо заплянаваны набор на ўвесь год: штомесяц — па 45 вайскоўцаў», — тлумачаць яны.

У латышскім войску плацяць няшмат — каля 300 латаў (600 даляраў). Але ў часы крызысу і гэта нядрэнна. У Эстоніі вайсковыя заробкі ў чатыры разы меншыя, затое там служаць вядомыя асобы, як, напрыклад, сын прэзыдэнта Эстоніі Луўкас-Крысцьян Ільвес, які сёлета адправіўся выконваць свой тэрминовы абавязак перад радзімай.