Кіеўскі студэнт загінуў у міліцэйскім пастарунку

Ва Ўкраіне распачалася пракурорская праверка з-за гучнай гісторыі гібелі студэнта ў райаддзеле кіеўскай міліцыі. У МУС заяўляюць, што студэнт памёр, бо некалькі разоў упаў, знаходзячыся ў стане алькагольнага ап’яненьня. Па словах бацькоў студэнта, цела агледзець ім не далі, а сябры загінулага сьцьвярджаюць, што церпяць ціск міліцыі.

19-гадовы Ігар сьвяткаваў у інтэрнаце свой 20 дзень народзінаў. У 8 гадзін вечара ён выйшаў праводзіць сябра, але сутыкнуўся з участковым, які пражываў у гэтым жа будынку. Як распавядаюць студэнты, завязалася сварка, і міліцыянт прапанаваў праехаць у райаддзел. Хлопец згадзіўся і самастойна сеў у машыну міліцыянта. Больш хлопца ў інтэрнаце ня бачылі.

Калі праз паўтары гадзіны ўчастковы вярнуўся ў інтэрнат, выкладчыкі, якія таксама знаходзіліся ў будынку, сталі прасіць адпусьціць хлопца. Аднак участковы адмовіўся, таму што, па яго словах, Ігар буяніў у пастарунку. Адпусьціць яго маглі толькі праз трое сутак.

На раніцу бацькам маладога чалавека прыйшло паведамленьне з просьбай забраць цела Ігара з моргу.

«Падчас знаходжаньня ў міліцыі студэнту стала дрэнна, і ён некалькі разоў упаў, з прычыны чаго атрымаў чэрапна-мазгавую траўму», — заяўляюць у Цэнтры грамадзкіх сувязяў МУС Украіны.

У міліцыі кажуць, што пасьля сьмерці студэнта судовая экспэртыза не выявіла сьлядоў гвалтоўнай сьмерці, але пры гэтым канстатавала чэрапна-мазгавую траўму і кровазьліцьцё. Бацькі ж Ігара кажуць, што ад пачатку ім паведамілі, што Ігар захлынуўся.

Дадатковую пікантнасьць гісторыі дадае тое, што ўначы ў аддзяленьне чатыры разы выклікалі хуткую, але забраць студэнта мэдыкі адмовіліся. І нават у моргу бацькам забаранілі агледзець цела.

Па словах міліцыянтаў, хуткую выклікалі, бо Ігар атрымаў траўму з прычыны знаходжаньня ў нецьвярозым стане, аднак мэдыкі шпіталізаваць яго адмовілася.

Акрамя таго ва ўкраінскія СМІ паступаюць тэлефанаваньні ад студэнтаў зь інтэрнату, якія заяўляюць, што міліцыя цісьне на іх з мэтай, каб падлеткі заявілі, што нібыта была бойка, і Ігар садзіўся ў міліцэйскую машыну ўжо зьбіты з праломленай галавой.

У пракуратуры Кіеву кажуць, што распачатая праверка па гэтым выпадку. Аднак ніхто з супрацоўнікаў пастарунку, дзе загінуў малады чалавек, пакуль не адхілены ад выкананьня службовых абавязкаў.

Паводле матэрыялаў УНІАН